Samgöngu- og sveitarstjórnarráðuneytið hefur gert nýjan samning við Icelandair sem tryggir lágmarks flug til Evrópu og Bandaríkjanna til og með 27. júní. Í frétt á vef stjórnarráðsins kemur fram að flogin verða tvö flug á viku á þrjá áfangastaði út samningstímann og hægt er að framlengja samninginn fram í september ef þörf krefur. Sem fyrr takmarkast ferðirnar við Boston, London og Stokkhólm en flug til New York og Kaupmannahafnar verður skoðað á tímabilinu. „Markmiðið er sem fyrr að tryggja flugsamgöngur til og frá landinu vegna þess ástands sem skapast hefur vegna Covid-19 faraldursins,“ segir í fréttinni.
Þar kemur fram að í aðdraganda samninga auglýstu Ríkiskaup eftir tilboðum á evrópska útboðsvefnum TED (Tenders Electronic Daily). Icelandair var eina flugfélagið sem gerði tilboð. Ríkið mun greiða að hámarki 300 milljónir króna vegna upphafstímabils samningsins frá 17. maí til 27. júní. Greiðslur fyrir flug á öllu tímabilinu geta að hámarki orðið hálfur milljarður króna. Tekjur Icelandair af flugunum munu ennfremur lækka greiðslur.
„Ráðuneytið getur framlengt samningnum tvívegis, fyrst til 8. ágúst og aftur til 19. september nk. Um er að ræða framhald á samningum sem gerðir hafa verið við Icelandair um lágmarks millilandaflug á tímabilinu 27. mars til og með 16. maí. Það voru Sigurður Ingi Jóhannsson, samgöngu- og sveitarstjórnarráðherra, og Bogi Nils Bogason, forstjóri Icelandair, sem undirrituðu samninginn með rafrænum hætti,“ segir á vef stjórnarráðsins.
Flogin verða tvö flug á viku á þrjá áfangastaði út samningstímann. Drög að flugáætlun fyrir tvær næstu vikur liggja fyrir. Þessar tvær vikur mun Icelandair fljúga samtals 12 ferðir (24 flugleggi) til Boston, London og Stokkhólms. Flugáætlun næstu tvær vikur er eftirfarandi með þeim fyrirvara að dagsetningar geta breyst og flug fallið niður:
Boston (Logan International – BOS) 21., 23., 28. og 30. maí.
London (Heathrow – LHR) 17., 20., 24. og 27. maí.
Stokkhólmur (Arlanda – ARN) 20., 23., 27. og 30. maí.
Verði unnt að fljúga til New York (JFK) eða Kaupmannahafnar á samningstímanum getur ríkið ákveðið í samráði við Icelandair að flogið verði til New York í stað Boston og til Kaupmannahafnar í stað Stokkhólms.
