Samfélagsmiðlar

Situr eitt að einum stærsta markaðnum fyrir Íslandsflug

Flugumferðin hefur dregist verulega saman síðan heimsfaraldurinn braust út í ársbyrjun. Wizz Air hefur þó haldið úti flugi hingað frá fimm pólskum borgum.

Langumsvifamesta flugfélagið á Keflavíkurflugvelli veitir Wizz Air ekki samkeppni um farþega á leið milli Íslands og Póllands. Og það gerir ekki heldur stærsta flugfélag Póllands þrátt fyrir að framboð á flugsætum héðan til pólskra borga hafi verið í kringum tíu þúsund sæti á mánuði fyrir heimsfaraldurinn.

Fækkunin í fyrra varð skiljanlega töluverð en þó hlutfallslega mun minni en sem nemur fækkun farþega á Keflavíkurflugvelli.

Þannig fóru 79 prósent færri farþegar um Flugstöð Leifs Eiríkssonar frá janúar til október í fyrra. Á þessu sama tímabili dróst framboð Wizz Air á flugi frá Íslandi til Póllands mun minna saman eða 39 prósent frá árinu 2019. Þetta sýnir samantekt sem gagnaveitan Cirium vann fyrir Túrista. Þar er ekki að finna tölur yfir fjölda farþega.

Fyrstu tíu mánuði 2020 þá bauð Wizz Air upp á nærri 65 þúsund sæti frá Keflavíkurflugvelli til fimm pólskra borga. Mest var framboðið til Varsjár eða sem nemur 24 þúsund sætum eins og sjá má á súluritinu hér fyrir neðan.

Fyrstu tíu mánuðina árið 2019 nam heildarframboðið nærri 108 þúsund sætum eða ríflega tíu þúsund sætum á mánuði. Það er jafn mikið af sætum og Icelandair bauð upp á í flugi sínu frá Íslandi til Boston á sama tíma. En bandaríska borgin hefur lengi verið einn þeirra áfangastaða sem Icelandair flýgur oftast til.

Icelandair hefur hins vegar ekki látið til sín taka á pólska markaðnum þrátt fyrir stærð hans. Ekki bara fyrir flug til Íslands heldur líka yfir til Bandaríkjanna. Stærsta flugfélag Póllands, LOT, hefur heldur ekki komið til Íslands. Telja má líklegt að ástæðan sé einfaldlega sú að stjórnendur þessara félaga telja sig ekki geta keppt við fargjöld Wizz Air.

Samkvæmt talningu Ferðamálastofu þá flugu um 79 þúsund Pólverjar frá Keflavíkurflugvelli janúar til október 2019. Á sama tíma í fyrra var farþegafjöldinn 33 þúsund farþegar en hafa verður í huga að inní þessum tölum eru Pólverjar búsettir á Íslandi.

Nýtt efni

Vaxandi óánægju gætir meðal leigusala og húsnæðismiðlara í Bandaríkjunum með það ægivald sem Airbnb hefur á skammtímaleigumarkaðnum. Margir eru sagðir leita leiða til að afla leigutekna utan eða meðfram kerfi bandaríska risans, sem gerir stöðugt meiri kröfur til þeirra sem leigja út vegna þrýstings frá samfélögum sem stynja undan umfangi og markaðsáhrifum skammtímaleigu til ferðafólks.  …

Flugsamstæðan Air France KLM hefur greint frá því að rekstrarhagnaður á síðasta ársfjórðungi hafi minnkað um 30% og er það verri afkoma en flugmálasérfræðingar bjuggust við. Helstu skýringar eru sagðar aukinn starfskostnaður og hærra olíuverð en búist var við. Þetta er veruleiki sem önnur flugfélög hafa almennt verið að kljást við. Á öðrum ársfjórðungi nam …

Þegar stjórnendur Play kynntu í apríl sl. uppgjör fyrirtækisins fyrir fyrstu þrjá mánuði ársins þá brugðu þeir út af vananum og birtu engan árshlutareikning. Þar með fengu fjárfestar og greinendur ekki aðgang að uppfærðum efnahagsreikningi fyrir flugfélagið þar sem meðal annars eigna- og skuldastaða kemur fram. Um leið fengust ekki upplýsingar um hvert eiginfjárhlutfall félagsins …

Suður-kóreski rafhlöðuframleiðandinn LG Energy Solution (LGES) á í viðræðum við þrjá ónefnda kínverska birgja um að framleiða ódýrar bílarafhlöður fyrir Evrópumarkað og bregðast þannig við hærri verndartollum Evrópusambandsins á rafbíla frá Kína.  Þetta hefur Reuters-fréttastofan eftir háttsettum heimildarmanni innan LGES, sem er í hópi stærstu rafhlöðuframleiðenda heims ásamt CATL í Kína, Panasonic í Japan og …

Þó margir njóti guðaveiga í sumarfríinu þá er hásumarið rólegur tími í heimi vínviðskipta. Það er löngu búið að ganga frá sölu á framleiðslu liðins árs en beðið tíðinda af næstu vínuppskeru. Þegar horft er á heildina þá hefur dregið úr vínsölu vegna efnahagsþrenginga og breyttra neysluhátta. En loftslagsbreytingar valda vínbændum víða erfiðleikum og hafa …

Það kemur skýrt fram í afkomutölum rafbílaframleiðandans Tesla að hægt hefur á orkuskiptum í bílasamgöngum. Á fyrri helmingi ársins hefur Tesla selt um 831 þúsund rafbíla en Elon Musk hafði spáð því að á árinu öllu myndu seljast um 1,8 milljónir bíla. Það vantar því enn mikið upp á að sú spá rætist. Sala Tesla …

Áður en Play fór í loftið sumarið 2021 var efnt til hlutafjárútboðs þar sem söfnuðust 10 milljarðar króna. Umsjón með útboðinu höfðu Arctica Finance og Arion banki en þessi tvö fjármálafyrirtæki komu einnig að fjármögnun Wow Air á sínum tíma. Í útboði meðal almennings reyndist umframeftirspurnin áttföld. Í kynningarefni sem fylgdi hlutafjárútboðinu var aðeins ein …

„Okkur er ánægja að tilkynna um fjölgun A350-900-véla í utanlandsflugi og A321neo í innanlandsflugi,“ segir Yukio Nakagawa, innkaupastjóri Japan Airlines, í tilkynningu félagsins um samninga við Airbus um kaup á nýjum þotum. „Með því að flýta því að taka í notkun nýjustu og sparneytnustu flugvélarnar viljum við veita viðskiptavinum okkar besta hugsanlegu þjónustu um leið …