Tveimur Boeing 767 breiðþotum Icelandair verður breytt í fraktvélar og þær teknar í gagnið sem slíkar í september 2022. Fyrir eru tvær Boeing 757 fraktflugvélar í flota Icelandair Cargo en nýju þoturnar taka umtalsvert meiri frakt eða allt að 53 til 55 tonn í hverri ferð. Þær eru líka mun sparneytnari á hvert flutt tonn.
„Stærri flugvélar gera okkur kleift að flytja meiri frakt milli Evrópu og Bandaríkjanna og þá í gegnum Ísland á sama hátt og leiðakerfi Icelandair er byggt upp í kringum farþegaflugið. Breiðþoturnar eru nógu stórar í þetta en flugvélarnar sem við erum með í dag eru ekki eins hagkvæmar þar sem einingakostnaðurinn er hærri og svo er umhverfisþátturinn líka orðinn stærri þáttur í flutningum í dag. Þeim mun minni sem flugvélin er, þeim mun meiri áhrif hefur hún á umhverfið,” útskýrir Gunnar Már Sigurfinnsson, framkvæmdastjóri Icelandair Cargo.
Fjöldi áfangastaða skiptir miklu máli
Hann segir að með stærri flugvélum verði hægt að tryggja viðskiptavinum félagsins betra aðgengi að plássi. Breiðþoturnar verði því góð viðbót við fraktflutninga í áætlunarflugi Icelandair og geri félaginu kleift að safna saman frakt hér á landi frá mörkuðum í Skandinavíu, meginlandi Evrópu og Bretlandi og flutt til Bandaríkjanna. Og auðvitað hina leiðina líka.
„Leiðakerfið hjá Icelandair er mjög spennandi kostur fyrir marga því það nær yfir stórt svæði og við getum þar boðið upp á fjölda áfangastaða. Það er staðreynd að víðfeðmt leiðarkerfi Icelandair hefur gert okkur kleift að byggja upp nýja öfluga markaði fyrir ferskan fisk í Bandaríkjunum og Evrópu í samstarfi við viðskiptavini okkar.“
Og Gunnar Már sér fram á aukna þörf fyrir fraktflutninga á sjávarafurðum. Vísar hann þar til áforma um stóraukna framleiðslu á laxi og þá staðreynd að hvítfiskstofnanir hafa verið á uppleið.
Kalifornía á radarnum
Um skeið flugu þotur Icelandair og WOW air reglulega til Kaliforníu og ljóst að bæði fiskútflytjendur og íslenskir innflytjendur hafa saknað þessara tíðnu ferða til vesturstrandar Bandaríkjanna. Spurður hvort Icelandair Cargo stefni á að fljúga breiðþotum sínum yfir á vesturströnd Bandaríkjanna þá segir Gunnar Már að með breiðþotunum skapist viss sveigjanleiki.
„Það sem hefur ekki verið framkvæmanlegt til þessa verður nú möguleiki með nýjum flota. Áherslan í dag er á þá staði sem við höfum verið með síðustu ár. Kalifornía er einn þeirra og er ennþá á radarnum. Núna ætlum við að ræða við viðskiptavini okkar og fara vel yfir með þeim hvar þeir sjá tækifæri í fraktflugi fyrir sig. Síðan þarf að athuga hvort það sé arðbært og þannig getum við tekið ákvörðun um framhaldið. Við erum þó alltaf fyrst og fremst að hugsa um okkar mikilvægu viðskiptavini hér á Íslandi og hvernig við getum styrkt kerfið í kringum Ísland,” segir Gunnar Már að lokum.
Túristi ræddi einnig kolefnisfótspor íslenskra sjávarafurða og fraktflug í MAX þotum við Gunnar Má. Þeir hluta samtalsins verða birtir hér yfir páskana.
