Samfélagsmiðlar

Átta sig ekki á endurkomu Andra Más

Aventura, ferðaskrifstofa Andra Más Ingólfssonar, selur í dag ferðir frá Íslandi til Tenerife og fleiri áfangastaða. Aventura hyggur á landvinninga fyrir árslok.

Í uppgjöri sínu við Andra Má Ingólfsson sumarið 2019 tók Arion banki yfir danska eignarhaldsfélagið Travelco Nordic. Sjö norrænar ferðaskrifstofur heyrðu undir félagið en þær höfðu áður verið hluti af íslensku samsteypunni Primera Travel Group. Andri Má var eini eigandi þess fyrirtækis en eftir gjaldþrot Primera Air, haustið 2018, var eignarhaldið á ferðaskrifstofunum fært í danska félagið.

Arion banki er ennþá með hluta af starfseminni á sinni könnu. Bankinn er til að mynda eini eigandi Heimsferða sem Andri Már stofnaði fyrir 29 árum síðan. Eins á Arion banki stóran hlut í Bravo Tours í Danmörku.

Andri Már hóf samkeppni við Heimsferðir í fyrra á íslenska markaðnum með opnun nýrrar ferðaskrifstofu sem fékk heitið Aventura. Og nú styttist í að Bravo Tours fái samkeppni frá fyrrum eiganda sínum því Aventura mun hefja sölu á ferðum frá Danmörku í næsta mánuði.

„Ég vil bara óska Andri gæfu og gengis. Við vitum þó ekki alveg hvað hann ætlar að gera,“ segir Peder Hornshøj, framkvæmdastjóri Bravo Tours í Danmörku þegar Túristi spyr hann úti í innkomu Aventura á danska markaðinn. Hornshøj vísar til þess að ekki liggi fyrir hvort ferðir Aventura verði farnar með leiguflugi eða áætlunarflugi og eins hvert þjónustigið verði hjá ferðaskrifstofunni. „Bravo Tours stendur sterkar en nokkru sinni áður og við erum því reiðubúin til að takast á við nýja keppinauta,“ bætir Hornshøj við.

Þeir Andri Már og Hornshøj voru lengi samverkamenn á skandinavíska markaðnum. Sá síðarnefndi seldi Andra Má Bravo Tours á sínum tíma og rak svo ferðaskrifstofuna um langt skeið. Í dag er Hornshøj einn af meðeigendum Arion banka í Bravo Tours en þar hefur lengi verið fókusað á sölu á sólarlandaferðum frá jóskum flugvöllum, t.d. Billund og Álaborg. Skrifstofur ferðaskrifstofunnar eru í Herning á Mið-Jótlandi en á lögmannsstofu í sömu borg er Aventura með heimilisfang í dag.

Þess ber að geta að Túristi hefur leitað upplýsinga frá Andra Má sjálfum um rekstur Aventura í Danmörku en ekki fengið nein svör.

Nýtt efni

Eftirspurn eftir ferðalögum til útlanda meðal Íslendinga er áfram sterk fullyrti Bogi Nils Bogason, forstjóri Icelandair, á kynningu á nýju uppgjöri flugfélagsins nú í morgun. Farþegum Icelandair frá heimamarkaðnum fækkaði hins vegar um 9 prósent á öðrum ársfjórðungi í samanburði við sama tímabil í fyrra. Þennan samdrátt útskýrði Bogi Nils með því að benda á …

Í byrjun júlí tóku gildi bráðabirgðatollar á rafbíla sem fluttir eru inn frá Kína til aðildarríkja Evrópusambandsins. Var gripið til þessa eftir að rannsókn á vegum Framkvæmdastjórnar Evrópusambandsins leiddi í ljós að kínverska framleiðslan nyti óeðlilega mikils ríkisstuðnings og skaði því evrópskir rafbílaframleiðendur. Aukatollurinn, sem nú leggst ofan á þann 10 prósent toll sem fyrir …

Á öðrum ársfjórðungi í fyrra hagnaðist Icelandair um 2,1 milljarð króna fyrir skatt en núna var niðurstaðan hagnaður upp á 73 milljónir króna. Í dollurum, uppgjörsmynt Icelandair, var rekstrarafkoman (Ebit) jákvæð um 3,3 milljónir dollara en 21 milljón í fyrra. Sú niðurstaða var sú besta í mörg ár eins og sjá má. Skilyrði til flugrekstrar …

Fyrir fjórum vikum síðan boðaði Lilja Dögg Al­freðsdótt­ir, menn­ing­ar- og viðskiptaráðherra, átak í markaðssetningu á Íslandi sem áfangastað fyrir ferðamenn. Segja má að ráðherrann hafi verið að svara kalli forsvarsfólks ferðaþjónustunnar sem hvatt hefur til opinberrar kynningar á Íslandi sem áfangastað líkt og víða tíðkast. Tveimur dögum eftir að Lilja Dögg lofaði „hundruðum millj­óna“ til …

Stjórnendur Icelandair og Play gáfu það út í sumarbyrjun að fargjöld hefðu lækkað vegna mikillar samkeppni í flugi yfir Atlantshafið. Félögin tvö þurfa nú í auknum mæli að sækja á þann markað þar sem minni eftirspurn er eftir Íslandsferðum. Gallinn er hins vegar sá að farþegar sem fljúga milli Evrópu og N-Ameríku, með millilendingu á …

Í júní í fyrra voru óvenju margir bandarískir ferðamenn á landinu miðað við flugframboð. Nú í sumar hefur flugferðunum fjölgað um 12 prósent en samt fækkaði bandarískum ferðamönnum um 19 prósent í nýliðnum júní. Það er Icelandair sem er langumsvifamest í flugi héðan til Bandaríkjanna og stóð félagið undir 7 af hverjum 10 flugferðum héðan …

Víðast hvar eru gistinætur útlendinga helsti mælikvarðinn á gang mála í ferðaþjónustu enda nær eingöngu eyríki að telja ferðafólk við landamæri með einföldum hætti. Hjá frændþjóðum okkar eru gistinæturnar því aðalmálið og nú fjölgar erlendu gestunum í Noregi þónokkuð frá fyrra ári en forsvarsfólk íslenskra ferðaþjónustufyrirtækja hefur undanfarna mánuði bent á harðnandi samkeppni við þau …

helsinki yfir

Hagstofur víða birta nú nýjar verðlagsmælingar sem flestar sýna að verðbólga er á niðurleið. Nú í morgunsárið var komið að finnsku hagstofunni og þar sýna tölur að verðlag hefur hækkað um 1,3 prósent síðastliðna 12 mánuði. Á milli maí og júní fór verðbólgan niður um 0,2 prósent. Það voru lækkandi húsnæðisvextir og fallandi verð á …