Samfélagsmiðlar

Segir nógu mikið á tankinum hjá Play fyrir nokkrar sveiflur

Núna eru sæti fyrir 192 farþega í þotum Play en sætunum verður fjölgað fyrir næsta sumar staðfestir Birgir Jónsson, forstjóri Play. Plássið verður þó ekki nýtt til hins ýtrasta að hans sögn.

Það tókst aðeins að selja um helming sætanna í áætlunarflugi Play í júlí, ágúst og september. Tekjur félagsins á þessum þriðja fjórðungi ársins voru því lægri en gert var ráð fyrir. Birgir Jónsson, forstjóri Play, segir að það hefði litlu breytt að lækka fargjöldin í sumar til að fá fleiri um borð.

„Það var bara enginn í hylnum ef svo má segja. Við vorum með rosalega lág verð en það var enginn að bíta á,” útskýrir Birgir. Verðlagningin var ekki breytan sem skýrir afhverju sætanýtingin í flugi félagsins hafi verið lægri en stefnt var að. Þar hafi lítil eftirspurn vegið þyngst að mati forstjórans.

Hann bendir þó að Play hefur náð góðri hlutdeild í flugi milli Íslands og Spánar eins og Túristi hefur fjallað um. Aftur á móti hafi flug til Parísar og Berlínar dregið nýtinguna niður í sumar og í haust en þar sé farið að hitna í kolunum. 

„Ég lít á það sem sigur að hafa náð svona hárri hlutdeild á stuttum tíma í Spánarfluginu. Við komum inn á markaðinn þegar fólk er að byrja að ferðast aftur. Ég skil því alveg að margir spyrji sig hvort þeir eigi að velja nýtt flugfélag eða þetta gamla góða. Mér finnst því frábært að við náðum svona stórum hluta af markaðnum hratt.”

Veturinn vanalega þungur í fluginu

Tap Play á þriðja fjórðungi þessa árs, júlí til september, nam 1,4 milljörðum króna samkvæmt uppgjöri sem félagið birti í lok síðustu viku. Framundan eru svo ársfjórðungar sem hingað til hafa einkennst af taprekstri í evrópskum fluggeira. Það er því mikilvægt að næsta sumar gangi vel, bæði hjá Play og öðrum flugfélögum. Sérstaklega í ljósi þess að nýliðið sumar einkenndist af neikvæðum áhrifum heimsfaraldursins.

Ef næsta sumarvertíð stendur ekki undir væntingum myndir þú þá treysta Play til að fara inn í næsta vetur með aðeins það fé sem þið hafið í dag? 

„Já, því eins og við höfum bent á þá er fjárhagslega staða okkar sterk. Við erum í raun skuldlaust félag og höfum nógu mikið á tankinum til að taka nokkrar sveiflur,” segir Birgir og vísar til þess að félagið sé í dag um 10 milljarða í lausafé.

Fleiri sæti í þoturnar

Frá því að Play hóf áætlunarflug í sumar þá hefur félagið nýtt þrjár Airbus A321 þotur með sæti fyrir 192 farþega. Það er þó pláss fyrir fleiri sætaraðir í þessari gerð flugvéla þó það sé mismunandi eftir útfærslum.

Hvenær á að bæta við sætum?

„Þegar Bandaríkjaflugið hefst þá fjölgum við sætum og vélarnar sem við fáum í vor eru í raun með fleiri sætum. Við ætlum hins vegar ekki að bjóða upp á stærri sæti. Núna eru í raun allir farþegar að fá bestu vöruna, þ.e. mesta fótaplássið. En í framtíðinni verður það þannig að þú getur borgað fyrir þetta sætabil sem er núna. Það verður þá mismunandi bil á milli sætaraða,” útskýrir Birgir.

Hann er þó ekki tilbúinn til að gefa það upp hversu mörgum sætum verður bætt við en segir að plássið verði ekki nýtt til hins ýtrasta.

„Við erum með miklu lengri flugleggi og getum ekki fullnýtt plássið. Það verður að vera meira sætabil en hjá þessum hörðustu lágfargjaldafélögum. Minnsta plássið hjá okkur verður bara álíka og það er hjá Icelandair, 28 til 29 tommur.”

Hærri leigugreiðslur frá áramótum

Nú í heimsfaraldrinum hefur framboð á farþegaþotum aukist og leiguverð lækkað í takt við það. Play hefur til að mynda aðeins greitt leigu sem miðast við hverja klukkustundsem þoturnar eru í notkun. Þar með fær leigusalinn engar greiðslur þegar þoturnar standa á Keflavíkurflugvelli. Frá og með áramótum þarf Play hins vegar að borga fasta leigu á mánuði. Það verður þó ekki til þess að flugáætlunin verði aukin til muna strax í byrjun næsta árs.

En hvað með leigugreiðslurnar. Verða þær t.d. tvöfalt hærri í janúar en núna í desember? 

„Nei, nei en það kemur inn auka kostnaður,” segir Birgir en segist ekki vera með í hausnum nákvæmlega hver breytingin verður. Hann bendir að lokum á að kjörin á þotunum sem Play fær í vor verði sveigjanleg til að byrja með líkt og raunin hafi verið með þoturnar þrjár sem eru í flota félagsins í dag.

Sem fyrr segir var sætanýtingin í flugi Play í sumar og september rétt innan við helmingur. Í október hækkað nýtingin aftur a móti umtalsvert eða upp í 68 prósent. Þá flutti félagið um 25 þúsund farþega og hafa þeir þá samtals verið 68 þúsund í ár. Samkvæmt sviðsmynd sem kynnt var í tengslum við hlutafjárútboð félagsins í sumarbyrjun var stefnt að 142 þúsund farþegum í ár. Ljóst er að svo margir verða þeir ekki.

Nýtt efni

Rekstrarafkoma Play var neikvæð um 2,9 milljarða króna í fyrra og svo bættust við rúmir þrír milljarðar í fjármagnskostnað. Tapið fyrir skatt nam því 6,3 milljörðum króna. Afkomuspáin fyrir yfirstandandi ár gerði ráð fyrir að rekstrarafkoman yrði í kringum núllið en nú hefur staðan versnað og reiknað er með neikvæðri afkomu. Þetta kemur fram í …

Verð á hlutabréfum í þýska rafhlöðuframleiðandanum Varta hrundi við opnun markaðar í Frankfurt í dag, eða um nærri 80%, eftir að fréttir bárust af tillögum um endurskipulagningu fyrirtækisins. Þær myndu leiða til þess að hlutabréf núverandi eigenda yrðu nánast verðlaus.  Meðal þess sem að rætt er um er að núverandi meirihlutaeigandi, austurríski milljarðamæringurinn Nichael Tojner, …

Meðal þess sem kom í ljós eftir Covid-19-faraldurinn var að starfsfólk skorti í vaxandi ferðaþjónustu víða um heim. Faraldurinn truflaði gangverk vinnumarkaðar margra landa og sér ekki fyrir endann á því. Skortur á starfsfólki gæti hamlað vexti í greininni. Ætli megi ekki segja að fólk vilji fremur ferðast en þjóna öðrum? Vandræði eru á mörgum …

Íslandssjóðir eru ekki lengur meðal 20 stærstu hluthafa Icelandair en sjóðastýringafyrirtækið, sem er í eigu Íslandsbanka, varð stærsti hluthafinn í Play eftir hlutafjáraukningu í apríl sl. Íslandssjóðir hafa síðustu mánuði dregið töluvert úr fjárfestingu sinni í Icelandair og eru ekki lengur meðal tuttugu stærstu hluthafanna. Nú eru aftur á móti tvö eignarhaldsfélög á vegum Högna …

Ekkert félag flýgur fleirum innan Evrópu en lágfargjaldaflugfélagið Ryanair gerir og síðustu mánuði hafa farþegar félagsins að jafnaði borgað minnað fyrir sætin en þeir sem voru á ferðinni í fyrra. Tekjur félagsins lækkuðu þannig á milli ára samkvæmt uppgjöri sem félagið birti í morgun fyrir fjórðunginn apríl til júní. Sá er fyrsti fjórðungur reikningsársins hjá …

BYD

Kínverski rafbílaframleiðandinn BYD lækkaði verð á bílum sínum á íslenska markaðnum í ársbyrjun þegar dregið var úr opinberum stuðningi við kaup á nýjum rafbílum. Þar með gat Vatt, sem er með umboð fyrir BYD hér á landi, boðið ódýrustu tegundina á lægra verði en í fyrra að því gefnu að kaupandinn fái hinn nýja rafbílastyrk …

Megn óánægja er meðal starfsmanna skemmtigarðsins Disneyland í Kaliforníu í Bandaríkjunum og hóta þeir nú verkfalli í fyrsta skipti frá árinu 1984. Kjaraviðræður sem staðið hafa síðan í apríl hafa engum árangri skilað. Ef af verður munu 14 þúsund starfsmenn skemmtigarðsins leggja niður störf samkvæmt frétt CNN en 99 prósent þeirra hafa samþykkt verkfallsaðgerðir. Til …

Flugferðirnar yfir Atlantshafið eru tíðari í dag en þær voru í fyrra en eftirspurnin hefur ekki aukist í sama mæli. Af þeim sökum fá flugfélögin minna fyrir hvert sæti og nú í vor nam lækkunin á ódýrasta farrými allt að fimmtungi að jafnaði. Og nú þegar markaðurinn fyrir Íslandsferðir er ekki eins sterkur og í …