Play flutti 75 þúsund farþega í nóvember og að jafnaði voru 8 af hverju 10 sætum skipuð farþegum. Í ferðum félagsins til London, Parísar og Tenerife var sætanýtingin ennþá hærri eða 90 prósent að því segir í tilkynningu sem fylgir mánaðarlegum flutningatölum félagsins.
Stjórnendur Play hafa hingað til ekki gefið upp í þessum tölum hvernig farþegahópurinn skiptist eftir Íslendingum, erlendum ferðamönnum og tengifarþegum. Hlutfall síðastnefnda hópsins er þó hægt að reikna út með hliðsjón af farþegatölum Isavia og Icelandair og það hefur Túristi notfært sér í greinum sínum.
Play birti hins vegar þessa skiptingu fyrir nýliðinn nóvember og þar segir að hlutfall tengifarþega hafi verið 39 prósent. Svo hátt hefur það ekki áður verið eins og sjá má hér fyrir neðan og þetta er jafnframt í fyrsta sinn sem hlutfall tengifarþega er hærra hjá Play en Icelandair.
Í því samhengi má rifja upp að hátt hlutfall tengifarþega í ágúst sl. var nefnt sem ein af ástæðum þess að tekjuspá Play á þriðja ársfjórðungi stóðst ekki. Var þá vísað til þess að tekjur af þessum farþegahópi væru lægri en til að mynda af erlendum ferðamönnum á leið til Íslands á þeim árstíma. Öðru máli gegnir um vetrarmánuðina segir Nadine Guðrún Yaghi, samskiptastjóri Play, í svari til Túrista.
„Þróunin hvað varðar farþega til landsins er áfram góð. Tengifarþegar skipta okkur hins vegar miklu máli á veturna en eins og við sögðum á dögunum viljum við sjá meiri farþega til landsins fyrir vor og sumar 2023. Svo skiptir það mjög miklu máli fyrir okkur núna að hafa svo góða sætanýtingu þegar hliðartekjurnar eru að aukast en það var annað sem við bentum á að hafi skort á þriðja ársfjórðungi.“
Í tilkynningu Play segir að 98 prósent ferða félagsins í nóvember hafi verið á réttum tíma og áfram er félagi því stundvísari en helsti keppinauturinn, Icelandair. Því félagi fór fram í nóvember og þá voru um 9 af hverjum 10 ferðum á réttum tíma.
