16 punktar um viðskiptin í Kauphöllinni í júlí

Það fóru fram nærri ellefu þúsund viðskipti á íslenska hlutabréfamarkaðnum í júlí sem er veruleg viðbót frá sama mánuði í fyrra og veltan jókst um 20 milljarða króna milli ára. 

• Aukin umsvif í Kauphöllinni í júlí skrifast að mestu á gríðarlega mikla veltu með bréf Íslandsbanka sem nam 21,3 milljörðum króna í júlí sem er aukning úr 1,7 milljarði króna frá sama mánuði í fyrra. 
• Af öðrum félögum sem voru með verulega aukningu má nefna fasteignafélagið Kaldalón sem hóf endurkaup á eigin bréfum í júlí sem hafði jákvæð áhrif á veltuna. Meðal þeirra sem bættu við sig í Kaldalóni var Frjálsi lífeyrissjóðurinn á meðan verðbréfasjóðir í stýringu Stefnis og Íslandssjóða seldu hluta af sínum bréfum.
• Einnig var talsverð aukning í veltu hjá Icelandair sem birti uppgjör í lok júlí sem reyndist síðan vera langt undir væntingum markaðsaðila. 
• Hjá Símanum var heilmikil aukning á veltu eða 1,6 milljarðar króna. Munar þar einna mest um að Lífeyrissjóður verzlunarmanna bætti við stöðu sína í félaginu um ríflega 230 milljónir króna ásamt því að endurkaup félagsins héldu áfram af krafti. 
• Kvika var mikið í fréttum vegna samrunatilkynninga og jókst veltan meðal annars vegna umsvifamikilla kaupa Gildis Lífeyrissjóðs sem juku við hlut sinn fyrir um 400 milljónir króna í júlí.
• Hagar sáu virkilega góða aukningu (155%) sem má rekja til ágætis uppgjörs í lok júní og svo hækkunar afkomuspár hjá samkeppnisaðilanum Festi um miðjan júlí. Lífeyrissjóður verzlunarmanna bætti við eign sína í báðum félögum í mánuðinum sem þó var gríðarlega stór fyrir. Fyrirhuguð skráning Dranga hf., móðurfélags nokkurra smásölufélaga tengd Skel og Samkaupum sem starfa á svipuðum mörkuðum og Hagar höfðu einnig áhrif á viðskipti með bréf Haga.
• Ólík þróun var í veltu hjá fasteignafélögunum Reitum og Heimum en velta Reita dróst saman um 730 milljónir á meðan veltan með Heima var upp á 350 milljónir króna.
• Samdráttur var einnig þó nokkur í veltu með Festi og Alvotech eða um 1 milljarður króna hjá hvoru félagi.
• Veltan dregst áfram verulega saman í JBT Marel (áður Marel) eða um 3,2 milljörðum króna milli ára í júlí þar sem viðskipti með bréf félagsins fara nú fram að mestu á hlutabréfamarkaði í New York.

Fjöldi viðskipta rúmlega tvöfaldast

• Í heildina eru tæplega ellefu þúsund viðskipti í júlí og aukast um sex þúsund frá fyrra ári. Líkt og þegar horft er til veltu þá er Íslandsbanki líka á toppnum þegar fjöldi viðskipta í júlí er skoðaður, nemur aukning milli ára yfir ellefu hundruð prósent. 

• Þó að velta dragist saman með Festi þá eykst fjöldi viðskipta um 168%. 
• Eins eru viðskipti með bréf Alvotech rúmlega tvöfalt fleiri en í fyrra þótt veltan sé að dragast saman um tæpan milljarð króna. Ef viðskipti með Alvotech eru skoðuð nánar þá er UBS-bankinn með um tvö hundruð viðskipti í mánuðinum þar sem 134 eru sölumegin.
• Góð aukning er einnig í fjölda viðskipta með bréf Icelandair sem kemur til vegna umróts kringum uppgjör félagsins sem töluverðar væntingar voru gerðar til.
• Mesti samdrátturinn í fjölda er hjá JBT Marel eða (-65%), sem helst í hendur við minnkandi veltu. 
• Viðskiptum með bréf í Ölgerðinni fækkar mikið milli ára (-67%) en í lok júní 2024 birti Ölgerðin uppgjör þar sem EBITDA-afkomuspá ársins var lækkuð um 400 milljónir króna sem skapaði óvenjumikla veltu.
• Play var skráð á First North-markaðinn í fyrra og því eru ekki samanburðartölur þar sem gögn ná bara til félaga á aðalmarkaði.

Greinarhöfundur hefur 20 ára reynslu á fjármálamarkaði, bæði sem sérfræðingur í eignastýringu og verðbréfamiðlari hjá Arion banka, og er nú einn af forsvarsmönnum kauphallarsjóðsins GlacierShares Nasdaq Iceland ETF.