Samfélagsmiðlar

Færri ferðamenn vegna breytinga á flugáætlun með litlum fyrirvara

Icelandair kynnti mjög umsvifamikla flugáætlun um miðjan síðasta mánuð. Nú hefur félagið aftur á móti þurft að fella niður stóran hluta og í sumum tilfellum er það gert með stuttum fyrirvara sem kemur illa niður á ferðaskrifstofum hér á landi.

Til stóð að Icelandair myndi fjölga ferðum héðan mjög ört eftir að ferðatakmarkanir voru felldar úr gildi víða í Evrópu. Þau áform hafa þó ekki gengið eftir.

Landamæri fjölda Evrópuríkja opnuðust þann 15. júní og þá var fallið frá kröfunni um að allir ferðamenn, sem hingað koma, fari í tveggja vikna sóttkví. Í tengslum við þessar breytingar kynnti Icelandair flugáætlun sem náði til 19. júlí.

Sú áætlun hefur nú verið skorin verulega niður. Til marks um það þá var upphaflega gert ráð fyrir 74 brottförum á vegum Icelandair í þessari viku en nú stefnir í að þrjátíu þeirra falli niður. Í næstu og þarnæstu viku nemur niðurskurðurinn ríflega fimmtíu ferðum eða um rúmlega helmingi framboðsins.

Munar þar mestu um að nærri allt flug til Bandaríkjanna var fellt niður vegna áframhaldandi ferðatakmarkana þaðan. Hátt í helmingi ferða til Evrópu í næstu og þarnæstu viku hefur sömuleiðis verið aflýst.

„Þessar flugbreytingar hafa komið illa við okkur og hafa dregið úr verulega úr komu gesta sem áttu bókaðar alferðir til Íslands,“ segir Pétur Óskarsson, framkvæmdastjóri Viator og einn af eigendum Katla-Travel, sem sérhæfir sig í skipulagningu Íslandsferða frá þýskumælandi löndum.

Pétur nefnir sem dæmi að hópaferðir hafi fallið niður vegna þess að brottförum hluta hópsins hafi verið aflýst og þar með er ekki lengur grundvöllur fyrir ferðalagi allra hinna.

„Á hverjum degi fáum við svo afbókanir frá einstaklingum sem áttu að koma á allra næstu dögum en nú hafa flugin verið felld niður. Oft hefur þetta fólk þegar breytt ferðaplönum sínum einu sinni eða tvisvar áður en missir svo flugið sitt á síðustu stundu,“ bætir Pétur við.

Hann segir svekkjandi að horfa á bókanir hrynja út vegna þessara breytinga á flugáætlun stuttu fyrir brottför.

Í viðtali við RÚV í vikunni sagði Birna Ósk Einarsdóttir, framkvæmdastjóri hjá Icelandair, að þar á bæ hafi verið ákveðið að bjóða strax upp á mikið framboð flugferða til að geta farið hratt af stað eftir að slakað var á ferðatakmörkunum. Aftur á móti hafi þurft að fella niður mikið af áætluninni þar sem ennþá er óvíst um hvenær Bandaríkjamenn mega ferðast hingað til lands. Flugframboð Icelandair til Evrópu byggir nefnilega að hluta til á tengifarþegum á leið til Norður-Ameríku.

Nýtt efni
Arnar Guðmundsson, Íslandsstofu

Íslandsstofa vinnur að því að markaðssetja Ísland sem ferðamannaland, kemur íslenskum fyrirtækjum á framfæri á erlendri grundu og liðkar til eftir bestu getu fyrir erlendri fjárfestingu á fimm sviðum atvinnulífs: orku og grænum lausnum, sjávarútvegi og matvælaframleiðslu, hugviti og tækni, listum og skapandi greinum - og loks ferðaþjónustu. Allt byggist þetta á útflutningsstefnu landsins, sem …

Það voru 27.293 starfandi í einkennandi greinum ferðaþjónustu hér á landi í mars 2024 sem er aukning um 2 prósent frá sama tíma í fyrra en 2 prósent færri í samanburði við mars 2018. Það ár voru ferðamenn hér flestir en gert er ráð fyrir álíka ferðamannastraumi í ár. Vægi starfsfólks með íslenskan bakgrunn er …

Þýski bílaframleiðandinn Volkswagen hefur slitið viðræðum við franska Renault um að þróa og smíða saman nýja gerð af rafknúnum smábíl á viðráðanlegu verði, sem keppt gæti við ódýrustu kínversku bílana. Hugmyndin var sú að bíllinn yrðu byggður á grunni Twingo-smábílsins frá Renault. Renault hyggst nú upp á eigin spýtur þróa Twingo áfram sem rafbíl og …

„Pittsburgh flugið fer vel af stað og er ánægjulegt að sjá að farþegar frá 25 Evrópulöndum hafa bókað flug með okkur til Pittsburgh um Ísland og þaðan hafa farþegar bókað flug til 30 áfangastaða Evrópumegin," sagði Bogi Nils Bogason, forstjóri Icelandair, í tilefni af fyrstu áætlunarferð flugfélagsins til bandarísku borgarinnar á fimmtudaginn. Forstjórinn lagði um …

Undirbúningur er á lokastigi um að koma á fót ævintýramiðstöð á Suðurlandi, þar sem gistiaðstaða og þjónusta verður tengd þjónustu, gönguferðum og útivist ævintýragjarnra ferðamanna. Ferðafólk, statt við Skógafoss, í ævintýraleit á Suðurlandi - MYND: ÓJ „Það koma stundum mjög athyglisverð verkefni, eins og þegar reynslumikill aðili úr ævintýraferðaþjónustu, sem hefur verið í slíkum rekstri …

Það er auðvitað eðlilegt að Barselóna, höfuðborg Katalóníu, dragi til sín mikinn fjölda ferðafólks. Borgin er fögur, sögurík og spennandi - en líka dálítið þreytt orðin á öllum þessum vinsældum, hömlulausum gestaganginum. Á síðasta ári gistu yfir 12 milljónir manna borginni, um sjö prósentum færri en 2019. Við bætast síðan allir þeir sem koma í …

Argentíski víniðnaðurinn hefur átt erfitt uppdráttar síðustu ár vegna óðaverðbólgu, óstöðugs gengis og minnkandi útflutnings. Það virðist þó heldur vera að lyftast brúnin á vínframleiðendum og virðast þeir helst þakka það harkalegri aðhaldsstefnu öfgakennda frjálshyggjumannsins Javier Milei, sem tók við forsetaembættinu í Argentínu í desember. Það tók strax að hægja á verðbólgu á fyrstu mánuðum …

Árið 2023 var 4.240 bókum bætt á lista yfir bannaðar bækur í Bandaríkjunum. Aldrei fyrr hafa jafn margar bækur verið bannaðar á einu ári. En á síðustu árum hefur þeim bókum sem settar eru á þennan bannlista fjölgað ár frá ári. Afleiðingin er sú að aðgengi að bókunum er takmarkað og þær eru fjarlægðar af …