Það fengust nærri þrír milljarðar króna fyrir þær þrjár Boeing 757-200 farþegaþotur sem Icelandair tilkynnti um sölu á í gærkvöld. Bókfært verð þotanna var á bilinu tveimur til þremur milljónum dollurum lægra samkvæmt því sem fram kom í tilkynningu. Það jafngildir um 280 til 415 milljónum króna.
Það var Icelease, íslenskt fyrirtæki sem sérhæfir sig í flugvélaviðskiptum, sem gekk frá kaupum á vélunum fyrir hönd fjárfestingasjóðs í Bandaríkjunum. Þetta kemur fram í svari Icelandair við fyrirspurn Túrista. Icelease var áður dótturfélag Icelandair Group.
Þotunum verður öllum breytt í fraktflugvélar en ein þeirra er TF-FIS sem var sérstaklega innréttuð í hittifyrra fyrir heimsreisur á vegum ferðaskrifstofunnar National Geographic.
Loftleiðir, dótturfélag Icelandair Group, gerði þriggja ára samning við ferðaskrifstofuna og fyrsta brottför á síðasta ári. Ein önnur þota á vegum Icelandair var einnig útbúin fyrir verkefnið.
Hinar tvær þoturnar sem seldar voru úr flota Icelandair eru TF-FIT og TF-LLX. Sú fyrrnefna hefur ekki verið nýtt í áætlunarflug síðan í febrúar. TF-LLX er aftur á móti ein af þeim þotum sem Icelandair hefur notað hvað mest þessa dagana í farþegaflug.
Í tilkynningu Icelandair í gærkvöld er haft eftir Boga Nils Bogasyni, forstjóra fyrirtækisins, að sala þotanna sé jákvætt skref fyrir félagið á þeim tíma þegar flugrekstur er í lágmarki. Að hans mati sýnir þetta líka að mikil verðmæti felist í Boeing 757 vélum félagsins eftir áralanga þjónustu við félagið.