Síðustu tvo vetur hafa rétt um sautján þúsund farþegar flogið frá Keflavíkurflugvelli til Tenerife. Rúmlega helmingur þessa hóps sat um borð hjá WOW air þarsíðasta vetur og í fyrra náði Norwegian ennþá hærri hlutdeild eins og sjá má á grafinu hér fyrir neðan. Bæði félög buðu upp á flug á eigin vegum til spænsku eyjunnar.
Ferðir Icelandair til Tenerife hafa aftur á móti takmarkast við leiguflug fyrir ferðaskrifstofur. Nú ætlar flugfélagið að spreyta sig á áætlunarferðum til Tenerife en samt sem áður muna alla vega þrjár ferðaskrifstofur kaupa sæti af Icelandair.
Þannig gerir Úrval-Útsýn ráð fyrir að fljúga sínum viðskiptavinum til Tenerife með flugfélaginu. Það ætlar líka Vita, sem tilheyrir Icelandair samsteypunni að gera, og einnig Aventura, sem er í eigu Andra Más Ingólfssonar.
Heimsferðir, sem Arion banki rekur, verða með eigin ferðir en ennþá liggur ekki fyrir hvað verður um útgerð Norwegian.
Ef norska félagið kemur ekki inn á markaðinn á ný þá skilur það eftir sig stórt skarð. Síðastliðinn vetur flutti félagið nefnilega 10.404 farþega frá Keflavíkurflugvelli til Tenerife. Það jafngildir sextíu prósent hlutdeild sem er aðeins meira en WOW air hafði veturinn á undan.
Þá nýttu 9.894 farþegar sér ferðir WOW air og hlutdeild félagsins var þá 57 prósent eins og sjá má hér fyrir neðan.
Þess má geta að upphaflega áform Play gerðu ráð fyrir flugi til Tenerife en stjórnendur þess ekki gefið út neina flugáætlun fyrir komandi ár.