Í tengslum við hlutafjárútboð Icelandair í september í fyrra var birt spá sérfræðinga félagsins um umsvifin næstu ársfjórðunga. Þar var gert ráð fyrir að framboðið í alþjóðaflugi yrði að jafnaði 313 milljónir sætiskílómetra (ASK) á mánuði á öðrum fjórðungi þessa árs.
Raunin varð önnur því framboðið í apríl, maí og júní var að meðaltali 232 milljónir sætiskílómetrar.
Í samanburði við annan ársfjórðung árið 2019 þá nam niðursveiflan 85 prósentum. Hún hefði verið 80 prósent ef fyrrnefnd spá hefði gengið eftir. Skekkjan fyrir fyrsta fjórðung þessa árs var minni eða tvö prósentustig.
Svokölluð grunnsviðsmynd stjórnenda Icelandair, fyrir allt árið 2021, byggir á að framboðið nemi í heildina fimm milljörðum sætiskílómetra. Nú þegar árið er hálfnað nemur framboðið tæplega níu hundruð milljónum sætiskílómetra. Til að ná því markmiði ársins þarf framboðið á seinni hluta ársins að vera að jafnaði helmingi meira í hverjum mánuði fyrir sig en það var í nýliðnum júní.
Hafa má í huga að þrátt fyrir færri farþega þá hefur Icelandair að undanförnu notað breiðþotur á fjölda flugleiða til að auka umsvifin í fraktflugi. Af þeim sökum verður sætanýtingin lakari en hún hefði þurft að vera og sætaframboðið á sama hátt meira en þörf var fyrir.
