Þrátt fyrir fækkun ferðamanna þá hækkuðu kortatekjur bílaleiganna í ágúst um rúmlega hálfan milljarð króna. Það eru því vísbendingar um að hærra hlutfall ferðamanna hafi kosið að ferðast í bílaleigubíl um landið en áður. Sigfús Bjarni Sigfússon, forstjóri Hertz, á hins vegar von á því að rútur verði valkostur fyrir fleiri næsta sumar.
Hér svarar Sigfús nokkrum spurningum Túrista um horfurnar fyrir veturinn og næsta sumar.
Hvernig lítur veturinn út?
Útlitið fyrir veturinn er bara nokkuð gott. Núna berum við okkur yfirleitt saman við árið 2019 og bókanir eru töluvert fleiri en á sama tíma og þá. Bandaríkjamenn eru sterkastir og við finnum núna mikinn áhuga frá Evrópubúum. Mest frá Bretlandi og Írlandi, Ítalíu og Skandinavíu. Við erum auðvitað komnir inn í veturinn. Þetta er því enginn fjöldi en áhuginn er greinilega þarna.
Eru bókanir að berast með lengri fyrirvara en áður?
Í okkar starfsemi hefur bókunarfyrirvari alltaf verið að styttast og hefur aldrei verið styttri en nú. En við finnum fyrir bókunum frá ferðaheildsölum fyrir næsta ár og teljum að viðskiptavinir þeirra vilji hafa vaðið fyrir neðan sig og bóka snemma til að fá þá þjónustu sem óskað er eftir.
Stefnir í álíka skort á bílaleigubílum næsta sumar eins og á nýliðinni sumarvertíð?
Þetta er stór spurning. Hvað munu koma margir ferðamenn til landsins á næsta ári? Margir segja tvöfalt fleiri en á þessu ári, það gera þá ca. 1 til 1,3 milljónir ferðamanna. Væntanlega munu þeir ferðast meira í rútum en þeir gerðu í faraldrinum. Við stefnum að því að auka flota okkar í skammtímalegu um ca. 20 til 25 prósent. Einn stór þáttur í þessu er framboð af bílum frá framleiðendum. Við höfum aldrei byrjað jafn snemma að ræða við bílaumboðin, sem við verslum við, um bílakaup fyrir næsta ár. Þeir segja flestir að verð á bílum muni hækka töluvert og að framleiðendur muni ekki hafa nóg af bílum fyrir bílaleigur.
Hefur hlutfall rafbíla aukist í flotanum?
Hlutfall okkar í rafbílum er alltaf að aukast. Eftirspurn eftir rafbílum til leigu er mest á innanlandsmarkaði, einstaklingar og fyrirtæki hvort sem í skammtíleigu eða langtímaleigu. Fjórðungur af flota okkar í dag er ýmist 100% rafmagn, plug-in eða hybrid. Rafmagnsíbílar eru mjög hentugir en það þarf rafmagn, hleðslustöðvar og drægni. Þetta mun koma hægt en sígandi þegar innviður hafa verið byggðir upp.
