SAS flugfélagið hefur gert hlé á flugi sínu til Íslands frá Ósló vegna kröfunnar um að allir ferðamenn framvísi neikvæðum niðurstöðum úr Covid-prófi við komuna til landsins. Frá þessu greindi Túristi í gær. Og nú í lok október ætlar Norwegian einnig að leggja niður ferðir sínar til Keflavíkurflugvallar frá höfuðborg Noregs.
Skýringin á því liggur þó ekki í sóttvarnaraðgerðum við íslensku landamærin heldur einfaldlega minni eftirspurn eftir flugi til Íslands í byrjun vetrar.
„Við höfum því haldið úti flugi á milli Noregs og Íslands í bráðum áratug. Reynslan hefur sýnt okkur að það eru fleiri sem vilja ferðast til Íslands á öðrum tímum árs en því tímabili sem nú fer í hönd. Og því verðum við að aðlaga framboðið að eftirspurninni,“ útskýrir upplýsingafulltrúi Norwegian.
Flugfélagið ætlar þó, líkt og SAS, að bjóða upp á flug til Íslands í kringum jól og áramót og svo hefst hefðbundið áætlunarflug á ný þann 17. febrúar á næsta ári.
Með tímabundnu brotthvarfi SAS og Norwegian þá verður Icelandair nú eitt um ferðirnar milli Íslands og Gardermoen flugvallar í Ósló næstu mánuði.
