Rekstur bandaríska flugfélagsins United Airlines var réttum megin við núllið í fyrra en eins og gefur að skilja var tapið gríðarlegt árin tvö á undan enda olli Covid-19 félaginu miklum skaða. Hagnaðurinn árið 2022 nam 737 milljónum bandaríkjadollara em jafngildir 105 milljörðum íslenskra króna. Til samanburðar skilaði félagið fjórfalt meiri hagnaði árið 2019.
Síðustu þrír mánuðirnir í fyrra komu þó betur út en sama tímabil árið 2019, bæði voru tekjurnar meiri og hagnaðurinn sömuleiðis. Og fjórði fjórðungur síðasta árs fór líka fram úr væntingum stjórnenda Delta flugfélagsins og voru tekjurnar 17 prósent hærri en þær voru þremur árum áður. Hagnaður Delta í fyrra nam 1,1 milljarði dollara eða 157 milljörðum króna miðað við gengi dagsins.
Bæði United og Delta fljúga hingað til lands og gerir dagskrá þess síðarnefnda ráð fyrir daglegum ferðum frá bæði New York og Minneapolis og fjórum brottförum í viku frá Detroit. Þotur United munu fljúga til Keflavíkurflugvallar frá bæði New York og Chicago, alla daga frá sumarbyrjun og fram á haust.
Og árið sem nú er nýhafið gæti orðið flugfélögum hagfellt gangi spár eftir. Þannig gerir nýtt mat flugvélaleigunnar Avolon, sem er ein sú stærsta í heimi, ráð fyrir að fluggeirinn hagnist um nærri 5 milljarða dollara í ár en til samanburðar töpuðu flugfélög heimsins samtals 180 milljörðum dollara árin 2020 og 2021.
