Það var rólegt í morgunsárið í Flugstöð Leifs Eiríkssonar á Keflavíkurflugvelli. Vegna boðaðs verkfalls flugumferðarstjóra hafði flugferðum Play verið seinkað en margar vélar félagsins fara á loft í hádeginu. Tveimur flugferðum Icelandair frá Bandaríkjunum hafði verið aflýst af sömu ástæðum. Tvær vélar Easyjet og ein frá British Airways komu frá Bretlandi fyrir hádegi. Brottfarir Icelandair, Finnair, Wizz Air og EasyJet voru nærri áætlun.
Þetta er staðan morguninn eftir að kraftmikið eldgos hófst við Sundhnúksgíga norðan Grindavíkur. Ekki er útlit á þessari stundu fyrir að flug raskist vegna eldgossins og flugumferðarstjórar hafa aflýst boðuðum verkfallsaðgerðum á morgun, miðvikudag.
![](https://ff7.is/wp-content/uploads/2023/12/Play-og-Wizz-1067x800.jpeg)
Farþegar innrita sig í morgun – MYND: ÓJ
Það var mjög rólegt á Keflavíkurflugvelli í morgun en í næsta nágrenni er ferðalöngum boðið upp á mikið sjónarspil. Vel sást til eldgossins frá Keflavíkurflugvelli og auðvitað frá Reykjanesbraut. Margir ökumenn freistuðust til að hægja ferðina þegar ekið var fyrir Vogastapa og horfa í átt að eldunum – þó að lögregla hafi beðið fólk um að sleppa því.
![](https://ff7.is/wp-content/uploads/2023/12/Eldgos-sed-fra-Vogastapa-1067x800.jpeg)
Horft til eldgossins frá Reykjanesbraut við Vogastapa – MYND: ÓJ
Grindavíkurvegur er auðvitað lokaður og þess er vel gætt að enginn fari hann. Þegar blaðamaður FF7 var þar á ferðinni í morgun var verið að vísa erlendum ferðamönnum í burtu.
![](https://ff7.is/wp-content/uploads/2023/12/Afleggjari-vid-Grindavikurveg.jpeg)
![](https://ff7.is/wp-content/uploads/2023/12/Oryggisverdir-vid-Grindavikurveg1.jpeg)
Við veginn til Grindavíkur – MYNDIR: ÓJ
Lögregla hafði víðar gát á ferðum forvitinna áhugamanna um eldgos. Veginum að Stapafelli var lokað og ökumönnum sem þangað höfðu farið var vísað í burtu. Rauðir logar lýstu upp morgunhimininn og minntu á hversu nærri þessir jarðeldar eru byggð og mannvirkjum.
![](https://ff7.is/wp-content/uploads/2023/12/Logga-og-eldgos-1066x800.jpeg)
![](https://ff7.is/wp-content/uploads/2023/12/Horft-til-eldgoss191223-1-1067x800.jpeg)
Eldgosið séð frá Hafnavegi – MYNDIR: ÓJ