Hugmyndir um kláf á Ísafirði hafa lengi legið í loftinu, frá því fyrir aldamót. Árið 2006 setti Úlfar Ágústsson, verslunarmaður, fram hugmyndir um kláf á ný og í framhaldinu var stofnað félagið Eyrarkláfur en ekkert varð úr þeim áætlunum. En fyrir nokkrum árum fór verkefnið aftur á skrið og í forsvari fyrir félaginu nú eru þeir Gissur Skarphéðinsson og Úlfur Úlfarsson.
![](https://ff7.is/wp-content/uploads/2024/01/Ulfur-og-Ulfar.jpg)
Úlfur Úlfarsson og Úlfar Ágústsson á Eyrarfjalli – MYND: Eyrarkláfur
Framkvæmdin þarf í umhverfismat
Sumarið 2021 úrskurðaði Skipulagsstofnun að framkvæmdin væri háð umhverfismati. Forsvarsmenn Eyrarkláfs kærðu ákvörðunina til Úrskurðarnefndar umhverfis- og auðlindamála og vildu fá hana fellda úr gildi en því var hafnað. Nú hefur félagið Eyrarkláfur fengið tveggja milljóna króna styrk úr Uppbyggingarsjóði Vestfjarða til að hefja umhverfismatsvinnu og sér félagið Rorum ehf. um umhverfismatið. Eftir að umhverfismat liggur fyrir þarf að fara í aðal- og deiliskipulagsvinnu.
![](https://ff7.is/wp-content/uploads/2024/01/Gissur-2.jpg)
Gissur Skarphéðinsson – MYND: Eyrarkláfur
Kláfur, veitingahús og gisting
Ætlunin er að reisa kláf og með honum tvö stöðvarhús, byrjunarstöð í þéttbýlinu á Ísafirði ofan Hlíðarvegar á Ísafirði – og endastöð uppi á fjallinu. Þá er ætlunin að byggja veitingastað á toppi Eyrarfjalls og gistieiningar eða hótel. „Markmiðið með kláfnum er að veita upplifun sem er ekki algeng á Vestfjörðum: Að einstaklingar fái nýja sýn á þetta svæði með því að eiga kost á að fara upp á Eyrarfjall á auðveldan hátt um leið og félagið býður viðskiptavinum framúrskarandi þjónustu með miklu öryggi,“ segir Gissur, og nefnir sem dæmi að kláfarnir fari inn í hús þegar upp er komið.
![](https://ff7.is/wp-content/uploads/2024/01/SvaeTHiTH-thar-sem-byrjun-arstodin-a-ad-vera.jpg)
Frá væntanlegum upphafsstað kláfsins – MYND: Eyrarkláfur
Gæti flutt allt að 5400 manns á dag
„Kláfurinn sem núna er verið að skoða er stærri og öflugri en sá sem var skoðaður 2006,” segir Gissur. Kláfurinn sem áætlað er að setja upp er af gerðinni 3S Gondola Lift sem Gissur segir að sé hagkvæmur kostur og þoli vel vind. „Hann verður með tveimur „vögnum“ á tveimur línum. Þegar annar er í efstu stöðu þá er hinn í neðstu stöðu. Hvor vagn tekur allt að 45 manns í hverri ferð.“
Eitt mastur kemur á milli neðri stöðvar og efri stöðvar til að lyfta kláfnum yfir Gleiðarhjalla. Hvor vagn getur farið þrjár til fimm ferðir upp á klukkustund, samtals sex til tíu ferðir. Miðað við hundrað prósent nýtingu á báðum vögnum er afkastageta kláfsins 270 til 450 manns á klukkustund eða 2700 til 5400 á dag en gert er ráð fyrir að kláfurinn sé um 6–7 mínútur upp á topp Eyrafjalls, segir Gissur. Hann bendir á að víða megi finna kláfa sem þennan til að mynda í Loen í Noregi.
![](https://ff7.is/wp-content/uploads/2024/01/Daemi-um-endastod-i-Loen.jpg)
Endastöð kláfsins í Loen – MYND: Eyrarkláfur
Farþegar skemmtiferðaskipa meginmarkhópurinn
Meginmarkhópur kláfsins er farþegar skemmtiferðaskipa „Í sumar komu um 200 þúsund farþegar með þeim,“ segir Gissur og tilkoma kláfsins komi svo til með að styrkja enn frekar Vestfjarðaleiðina og að fleiri komi þá landleiðina. Kláfurinn er nú þegar orðinn hluti af áfangastaðaáætlun Vestfjarða.
Áætlaður kostnaður 3,5 milljarðar
Áætlaður heildarkostnaður verkefnisins eru 3,5 milljarðar króna. Gissur segir að fjármögnun sé ekki farin af stað og að það verði ekki farið af stað með hana fyrr en umhverfismat og skipulagsvinnu sé lokið. Hann áætlar að umhverfismatsvinna taki um eitt til eitt og hálft ár og að skipulagsvinna, framkvæmdir við stöðvarhús, veitingahús og uppsetning kláfsins taki um þrjú ár. Samkvæmt upplýsingum frá Eyrarkláfi kemur fram að framkvæmdin komi til með að skapa 25-30 varanleg störf auk afleiddra starfa. Þá skapist atvinna við uppsetningu kláfsins.
![](https://ff7.is/wp-content/uploads/2024/01/Daemi-um-sambaerilegan-klaf-i-Loen.jpg)
Kláfur og veitingastaður í Loen í Noregi – MYND: Eyrarkláfur
7.500 krónur fyrir farið
Ætlunin er að hafa kláfinn opinn allt árið ef veður leyfir og þá aðallega um helgar yfir veturinn. Fyrsta áætlun gerir ráð fyrir að far upp og niður kosti 7.500 krónur fyrir fullorðinn einstakling.
Stefnt er að því að kynna verkefnið fyrir íbúum á Ísafirði á vormánuðum. Þá verður kynnt framvinda verkefnisins sem og tekið við ábendingum og athugasemdum um hvað betur megi fara.
![](https://ff7.is/wp-content/uploads/2024/01/Utsynid-ad-ofan.jpg)
Horft yfir Skutulsfjörð frá væntanlegri endastöð kláfsins á Eyrarfjalli – MYND: Eyrarkláfur