Kynnisferðir, sem starfa undir vörumerkinu Icelandia, hafa gengið frá kaupum á öllu hlutafé í Dive.is. Fyrir áttu Kynnisferðir 51% hlut í félaginu á móti Tobias Klose. Dive.is sérhæfir sig í köfunar- og snorklferðum í Silfru auk þess að bjóða upp á námskeið í köfun. Félagið leggur mikið uppúr upplifun viðskiptavina enda er það í efsta sæti á
Tripadvisor yfir fyrirtæki sem bjóða uppá afþreyingu frá Reykjavík og er þar með meira en tólf þúsund fimm stjörnu umsagnir. Dive.is er auk þess fimm stjörnu PADI köfunarskóli sem kennir flest þurrbúninganámskeið á ári í allri Evrópu.
,,Það er búið að vera gríðarlega spennandi að fylgjast með og taka þátt í uppbyggingu Icelandia og samþættingu á allri þeirri þjónustu sem fellur undir það vörumerki. Með þessu skrefi mun rekstur okkar samþættast enn frekar rekstri Icelandia sem mun færa okkur aukinn slagkraft í okkar starfi,“ segir Höskuldur Elefsen, framkvæmdastjóri Dive.is, í tilkynningu.
Þar er haft eftir Birni Ragnarssyni, forstjóra Icelandia, að það sé mikið fagnaðarefni að fá Höskuld og hans frábæra teymi að fullu inn í Icelandia fjölskylduna. „Sú einstaka upplifun sem Dive.is hefur skapað gestum sínum er eftirtektarverð og hvetjandi fyrir okkur öll sem störfum í ferðaþjónustu.“
Velta Dive.is á síðasta ári var kr. 575 milljónir og störfuðu að jafnaði 24 starfsmenn hjá félaginu.
Eignast Dive.is að fullu
Höskuldur Elefsen, framkvæmdastjóri Dive.is. MYNDIR: ICELANDIA
