Því var fagnað í gær að undirrituð hefði verið viljayfirlýsingu um að Íslandshótel og fjárfestar tengdir Skógarböðunum ætluðu að byggja og reka fjögurra stjörnu hótel við Skógarböðin í Eyjafirði gegnt Akureyri. Á væntanlegu baðhóteli verða 120 herbergi.
Sjallinn – MYND: Facebook-síða Sjallans
Íslandshótel hafa líka haft áform um að reisa hótel í miðbæ Akureyrar, þar sem hinn fornfrægi skemmtistaður Sjálfstæðishúsið, eða Sjallinn, stendur. Fyrirtækið keypti Sjallann árið 2016 en þrjú ár voru þá liðin frá því að bæjaryfirvöld höfðu samþykkt að ný bygging yrði reist á lóðinni. Margsinnis hefur verið rætt að skortur á nýju og vönduðu hótelrými standi ferðaþjónustu á Akureyri og í nærsveitum fyrir þrifum.
Davíð Torfi Ólafsson, forstjóri Íslandshótela – MYND: Íslandshótel
Eðlilegt var að spyrja hvort áformin við Skógarböðin breyttu hugmyndum Íslandshótela um að byggja hótel á Sjallareitnum?
„Íslandshótel munu opna hótel á Sjallareitnum en með tilkomu hótelsins við Skógarböðin þá mun hótelið á Sjallareitnum verða með annarskonar rekstrarform, sem kynnt verður síðar. Stefnt er að opnun hótelsins á Sjallareitnum um tveimur árum eftir opnun Skógarbaðahótelsins,“ segir Davíð Torfi Ólafsson, forstjóri Íslandshótela.
Þetta þýðir að hótelið við Geislagötu á Akureyri verður opnað vorið 2028 – að fjórum árum liðnum. Davíð Torfi segir við FF7 að miðað við núverandi hönnun sé gert ráð fyrir að hótelið í miðbæ Akureyrar verði með 135 herbergi en segir að verið sé að endurskoða fyrri áætlanir. „Líklegt er að herbergin verði fleiri,“ segir Davíð Torfi.