„Heiðarleg samkeppni er af hinu góða. En það sem við kunnum ekki að meta er þegar Kínverjar yfirfylla markaðinn með stórlega niðurgreiddum rafbílum. Við verðum að bregðast við og verja iðnað okkar,“ sagði Ursula von der Leyen, forseti Framkvæmdastjórnar Evrópusambandsins, í vikunni þar sem hún ræddi mögulega refsitolla á kínverska rafbíla.
Í Hvíta húsinu er viðhorfið það sama því nú íhugar stjórn Joe Biden, Bandaríkjaforseta, að leggja á 100 prósent verndartolla á innflutning á kínverskum rafbílum . Þetta herma heimildir Financial Times en í dag nemur tollurinn 25 prósentum og var settur á í forsetatíð Donald Trump.
Það verða ekki aðeins rafbílar frá Kína sem fá á sig þessa háu tolla því breytingin nær einnig til rafhlaðna og ýmissa hráefna sem bandarísk fyrirtæki kaupa, til að mynda til framleiðslu rafknúnum ökutækjum.
