Þó heimavöllur Volvo sé í Gautaborg í Svíþjóð þá hefur kínverska samsteypan Geely átt meirihlutann í fyrirtækinu allt frá árinu 2010. Stór hluti af framleiðslu á Volvo bílum fer líka fram í Kína en nú herma heimildir The Times að Volvo ætli að flytja framleiðslu á rafbílum til Belgíu. Byrjað verður á stærstu og minnstu tegundunum, EX90 og EX30.
Skýringin á þessari breytingu liggur í yfirvofandi hækkun tolla á innflutning kínverska rafbíla til aðildarríkja Evrópusambandsins. Vilja ráðamenn í Brussel meina að kínversk framleiðsla á „grænni tækni“ njóti óeðlilegs opinbers stuðnings heima fyrir.
„Heiðarleg samkeppni er af hinu góða. En það sem við kunnum ekki að meta er þegar Kínverjar yfirfylla markaðinn með stórlega niðurgreiddum rafbílum. Við verðum að bregðast við og verja iðnað okkar,“ sagði Ursula von der Leyen, forseti Framkvæmdastjórnar Evrópusambandsins, í sumarbyrjun þegar hún ræddi mögulega refsitolla á kínverska rafbíla.
Í Bandaríkjunum hefur verið tekin ákvörðun um að hækka tolla á innflutning á kínverskum rafbílum úr 25 prósentum í 100 prósent.
Tollar á bílainnflutning til ríkja ESB nemur í dag 10 prósentum en nýir refsitollar á kínverska rafbíla verður mögulega kynntur í næstu viku samkvæmt frétt The Times.
