Losun Seðlabanka Íslands nam 1117,9 tonnum koltvísýringsígilda (tCO₂í) á síðasta ári sem er fjórfalt meira en árið áður. Skýringin á þessari miklu viðbót liggur í nákvæmara grænu bókahaldi og auknum umsvifum.
„Einnig gætti áhrifa þess að viðskiptaferðir og staðvinna jukust aftur samhliða dvínandi áhrifum Covid-19 faraldursins,“ að því segir í nýrri sjálfbærniskýrslu bankans sem kom út í dag. Vinnuferðum starfsmanna fjölgaði nefnilega mjög á milli ára og næststærsti losunarþátturinn í starfsemi bankans í fyrra skrifast á flugferðir eða samtals 248,5 tCO₂í.
Aðkeyptar vörur og þjónusta var hins vegar stærsti losunarþáttur Seðlabanka Íslands árið 2023 og nam hann 685,8 tCO₂í. Þarna vega þyngst kaup á 17 tonnum af raftækjum sem losuðu 426,1 tCO₂ og 256,8 tCO₂ skrifast á innkaup á 46 tonnum af matvælum. Mest var losun vegna aðkeyptra mjólkurvara og eggja, þar á eftir vegna kjötvara og sjávarfangs.
Ferðir starfsfólks, til og frá vinnu, eru þriðji stærsti einstaki liðurinn í losunarbókhaldi Seðlabankans fyrir síðasta ár. Samtals losuðu þessar ferðir 87,6 tCO₂í en þær eru að megninu til farnar í einkabílum samkvæmt ferðavenjukönnun bankans. Tekið er fram í samantekt Seðlabankans að ferðavenjukönnunin í fyrra hafi verið nákvæmari en árið á undan.