Kapphlaup íslensku flugfélaganna um áætlunarferðir frá Dallas-Fort Worth flugvelli hófst í september 2017. Þá tilkynnti WOW air að félagið setti stefnuna á þessa næstfjölförnustu flughöfn Texas-fylkis og viku síðar boðaði Icelandair komu sína þangað. Flugvöllurinn í Dallas er helsta starfsstöð American Airlines, stærsta flugfélags í heimi, og stjórnendur þess svöruðu þessari samkeppni íslensku flugfélaganna með því að lofa sínu fyrsta Íslandsflugi.
Í byrjun síðasta sumars hófu félögin þrjú svo áætlunarflugið milli Texas og Íslands og stóð það yfir fram í haustlok. 174 sæta þotur American Airlines komu hingað daglega á meðan WOW flaug 345 sæta breiðþotum á milli borganna þrisvar í viku og Icelandir nýtti sínar hefðbundu 183 sæta Boeing flugvélar í fjórar vikulegar ferðir. Frá maí og fram í lok október fór samtals 99.451 farþegi þessa leið samkvæmt svari flugmálayfirvalda í Dallas við fyrirspurn Túrista. Eru farþegar taldir á hverjum legg fyrir sig og því tvítaldir ef þeir eiga miða báðar leiðir.
Þrátt fyrir fjöldann þá hafa stjórnendur íslensku flugfélaganna ákveðið að láta American Airlines eftir flugið. Þotur félaganna tveggja snúa því ekki aftur til Dallas. Í svari til Túrista segir talskona bandaríska flugfélagsins hins vegar að þar á bæ ríki ánægja með fyrstu vertíðina á Íslandi og þráðurinn verði tekinn upp aftur nú í sumar.
Lítill hluti frá Íslandi
Af þessum nærri eitt hundrað þúsund farþegum, sem flugu milli Dallas Fort-Worth og Keflavíkurflugvallar, frá maí og fram í lok október, þá voru 53.430 eingöngu á leiðinni á milli Dallas og Íslands. Hinir 46.201 byrjuðu eða enduðu ferðalagið annars staðar. Flugu til að mynda frá Oklahoma borg eða Phoenix til Dallas og þaðan til Íslands. Eða ferðuðust frá Dublin til Dallas með millilendingu á Keflavíkurflugvelli. Athygli vekur að 92,2 prósent allra þeirra sem flugu beint á milli borganna hófu ferðalagið í Dallas en aðeins 7,8 prósent flugu héðan samkvæmt svari Dallas flugvallar við fyrirspurn Túrista.
Þotur American Airlines best nýttar
Ekki fást upplýsingar frá Dallas flugvelli um hvernig þessir nærri 100 þúsund farþegar skiptust á milli flugfélagaanna þriggja. Það sést þó í öðrum tölum flugvallarins að Icelandair hefur flutt 21.525 farþegar til og frá Dallas frá maí og fram í október og WOW air flogið með 36.158. Þar með er ljóst að farþegafjöldinn í Íslandsflugi American Airlines var rétt tæplega 42 þúsund. Talning Túrista á flugferðum til og frá Keflavíkurflugvelli leiðir í ljós að farnar voru nákvæmlega 580 áætlunarferðir milli Íslands og Dallas á þessu sex mánaða tímabili. Út frá þessu má sjá að sætanýtingin var hæst hjá American Airlines eða 84 prósent. Hjá WOW var hún 81 prósent en 7 af hverjum 10 sætum í vélum Icelandair voru frátekin.
Fleiri ferðamenn frá Dallas en Sviss
Í ofantöldum upplýsingum leynast áhugaverðar tölur fyrir íslenska ferðaþjónustu sem sýna að frá Dallas hafa komið um 24 þúsund ferðamenn til Íslands á þessu sex mánaða tímabili. Er þá aðeins litið til hlutfalls þeirra sem flaug beint hingað frá Dallas og tekið er tillit til tvítalningarinnar sem áður er nefnd. Ferðamennirnir frá Dallassvæðinu frá maí og fram í október voru þá ögn fleiri en allir þeir sem komu hingað með svissneskt vegabréf á tímabilinu (21 þúsund) og álíka margir og komu hingað frá Finnlandi og Rússlandi samanlagt.
Þess má geta að svona greinargóðar upplýsingar um flugumferð eru ekki opinberar hér á landi. Túristi kærði þennan upplýsingaskort íslenskra flugmálayfirvalda og Isavia til úrskurðarnefndar upplýsingamála í maí í fyrra en niðurstaða í málinu liggur ekki fyrir. Í kæru Túrista var bent á mikilvægi góðra upplýsinga um flugumferð fyrir íslenska ferðaþjónustu. Eins og dæmið hér að ofan sýnir þá hefur hið nýja Dallasflug verið vel nýtt af bandarískum ferðamönnum á leið til Íslands. Nú er hins vegar fyrirséð að bæði Icelandair og WOW air ætla að hætta ferðum sínum þangað og þar með miklar líkur á að ferðafólki frá Dallas og nágrenni fækkar hér á landi í ár.
