Það voru 170 þúsund farþegar sem flugu milli ensku borgarinnar Manchester og Keflavíkurflugvallar allt árið 2019 og vafalítið voru ófáir í þeim hópi Íslendingar á leið á fótboltaleik Manchester eða nágrannaborginni Liverpool. Þess háttar ferðir verða vonandi mögulegar á nýjan leik þegar næsta tímabili í enska boltanum hefst. Og þá eykst um leið samkeppnin í flugi milli Keflavíkurflugvallar og Manchester.
Ástæðan er sú að nú ætlar breska lággjaldaflugfélagið Jet2 að bjóða upp á ferðir frá Íslandi til ensku borgarinnar alla fimmtudaga og mánudaga frá og með 30. september til 22. nóvember. Félagið gerir þá hlé á ferðunum fram í febrúar 2022.
Flugvélar Jet2 munu fljúga frá Keflavíkurflugvelli klukkun 12 þessa tvo daga í viku og leggja í hann frá Manchester árla dags.
Hingað til hafa easyJet og Icelandair verið ein á þessari flugleið og vetrardagskrá easyJet gerir ráð fyrir ferðum frá Keflavíkurflugvelli til Manchester á fimmtudögum og sunnudögum.
Gallinn við sunnudagsbrottförina frá Manchester er að hún er klukkan korter í sjö að morgni. Þar með þurfa farþegar að taka daginn mjög snemma.
Þotur Icelandair munu aftur á móti fljúga til Manchester á mánudögum, föstudögum á sunnudögum. Í öllum tilvikum er flogið út að morgni frá Íslandi og heimferðin frá Manchester er hádeginu.
Þar með ná farþegar Icelandair ekki sunnudagsleik í enska boltanum. Sá ókostur kann að skýra afhverju farmiðarnir hjá Icelandair á mánudögum frá Manchester eru nokkru dýrari samkvæmt athugun Túrista.
Sem fyrr segir fljúga bæði Jet2 og easyJet til Manchester á fimmtudögum á meðan brottför Icelandair er á föstudögum. Þeir sem vilja vera frá föstudegi til mánudags geta í sumum tilvikum sett saman ódýrari ferðir með því að fljúga með íslenska flugfélaginu út en Jet2 til heim á mánudeginum.
