Kanadíska lágfargjaldaflugfélagið Westjet er með frátekin lendingarleyfi á Keflavíkurflugvelli fyrir næstu sumarvertíð. Bæði fyrir áætlunarferðir frá Toronto og Calgary.
Tveggja vikna sóttkví er hins vegar ennþá skilda í Kanada og aðeins íbúar landsins fá að fara inn fyrir landamærin.
Nú í ársbyrjun hafa stjórnendur Westjet hins vegar skorið niður stóran hluta af ferðum félagsins til útlanda þar sem landamærum Kanada verður áfram haldið lokuðum. Alla vega fyrir öllum öðrum en íbúum landsins og þeim sem eiga þangað áríðandi erindi.
Þar með má telja næsta víst að ekkert verður af Íslandsflugi Westjet í ár enda hafði félagið ekki ennþá hafið sölu á farmiðum til Íslands. Hvorki frá Calgary né Toronto. Þar með takmarkast ferðir héðan til Kanada áfram við áætlunarflug Air Canada og Icelandair.
Það fyrrnefnda áformar að hefja flugið hingað á ný í byrjun sumars á meðan flugáætlun Icelandair í dag gerir ráð fyrir ferðum til Toronto og Vancouver á ný þann 8. mars nk. Samkvæmt heimasíðu Icelandair verður flogið til Toronto á Boeing MAX9 þotu.
Bæði Westjet og Air Canada eru með þess háttar þotur í sínum flota og sumarið 2018 nýtti það síðarnefnda MAX þotur í Íslandsflug sitt.
