Fyrstu þrjá mánuði ársins fækkaði farþegum Icelandair um 96 prósent en aftur á móti hafa fraktflutningar félagsins aukist um 12 prósent, í tonnum talið, í ár. Á sama tíma hefur verðskráin fyrir fraktina hækkað um helming. Þessi verðbreyting er þó ekki varanleg segir Gunnar Már Sigurfinnsson, framkvæmdastjóri, Icelandair Cargo.
„Fraktverð í heiminum hefur hækkað gríðarlega eftir að Covid faraldurinn skall á. Það skrifast meðal annars á mikinn samdrátt í áætlunarflugi. Vöruflutningar með áætlunarflugi eru ódýrari en sérstakt fraktflug. Við þurftum því að grípa til þess að hækka verðið á fraktfluginu til Bandaríkjanna um fimmtíu til sextíu prósent enda var áhættan og kostnaðurinn af fluginu mun meiri en áður. Afkoman af fraktfluginu hefur þó verið betri en við gerðum ráð fyrir því við höfum náð í aukna flutninga á frakt milli Evrópu og Bandaríkjanna,” segir Gunnar Már aðspurður um hvernig verðlagið hefur þróast síðustu misseri.
Hann segir að verðhækkunin sé því tímabundið ráðstöfun og það þekki viðskiptavinirnir Icelandair Cargo. Kostnaðurinn við fraktflutningana muni lækka þegar áætlunarflugið er komið í gang á ný.
Eftirspurn aukist eftir íslenskum fiski
Icelandair hefur haldið úti flugi til Boston allt síðastliðið ár og hefur íslenska ríkið stutt við þær ferðir. Keppinautar íslensks sjávarfangs hafa hins vegar ekki náð að flytja sinn fisk út með sama hætti og þeir því misst viðskipti.
„Það eru þó allir sammála um, bæði við og viðskiptavinir okkar, að megin verkefnið var að tryggja að varan yrði áfram til á mörkuðum ytra. Og það hefur tekist. Nú flytjum við meira magn af fiski til Boston en fyrir Covid. Eftirspurnin hefur líka aukist sem skrifast meðal annars á þá staðreynd að önnur ríki hafa ekki náð að flytja sinn fisk á markaðinn úti í eins miklu magni og áður. Við höfum því verið að vinna markaði í þessu skrýtna árferði og samt eru veitingastaðir að miklu leyti ennþá lokaðir. Sá markaður er því alveg eftir. Þannig að við sjáum fram á mikil tækifæri. Þegar nýi flotinn er kominn í gagnið þá verður kostnaður af fraktfluginu lægri og við getum flutt meira magn,“ útskýrir Gunnar Már.
Stærri hluti af fraktinni með farþegafluginu
Líkt og fjallað hefur verið um hér á síðum Túrista síðustu daga þá er sótspor íslensks fisks, sem fluttur er út í flugi, töluvert lægra en þess norska. Og sérstaklega þegar fiskurinn er fluttur í áætlunarflugi Icelandair. Vægi þess háttar flutninga hefur aukist verulega síðustu ár.
“Við höfum unnið að því bæði leynt og ljóst að byggja upp flutningana í leiðakerfi Icelandair enda er það hagkvæmasta kerfið, bæði fyrir viðskiptavinina, okkur og umhverfið. Og til marks um árangurinn þá fluttum við orðið sjötíu prósent af fraktinni í farþegakerfinu fyrir Covid. Árið 2008 var hlutfallið aðeins 16 prósent. Það er samt þannig að það að hafa bæði kerfin, það er farþega og fraktvéla, sem vinna með hvort öðru, býr til sveigjanleika og setur okkur og viðskiptavini okkar í ótrúlega góða stöðu í harði samkeppni um aðgengi að verðmætum mörkuðum víða um heiminn,“ segir Gunnar Már.
