Það hafa verið töluverðar sveiflur í erlendri greiðslukortaveltu hér á landi síðan ferðamannasumarið hófst. Í maí var velta á hvern og einn þannig töluvert meiri en hún hafði áður verið þegar upphæðinni var deilt niður á erlenda ferðamenn í þeim mánuði.
Meðaltalið var 388 þúsund krónur á hvern og einn sem var furðulega há tala. Sérstaklega þegar horft var til þess að útgjöld á gististöðum voru hlutfallslega minni en áður líkt og Túristi benti á.
Það er því ekki ólíklegt að það hafi að miklu leyti verið Íslendingar, búsettir í útlöndum og með erlend greiðslukort, sem voru svona eyðsluglaðir á landinu í maí.
Í júní og júlí lækkaði meðaleyðsla á hvern erlendan ferðamann um nærri því helming. Fór niður í rúmlega tvö hundrað þúsund krónur. Á sama tíma jukust útgjöldin í gistingu sem er vísbending um að fleiri ferðamenn hafi staðið undir kortaveltunni í stað burtfluttra Íslendinga.
Og þegar við skoðum veltuna eftir þjóðernum í júlí, en horfum aðeins til þjóða með fleiri en eitt þúsund ferðamenn, þá kemur í ljós að Svisslendingar eyddu að jafnaði langmestu. Meðalneyslan í júlí var 588 þúsund krónur á hvern og einn.
Í því samhengi er rétt að rifja upp að Íslendingar, búsettir í Sviss, en í ferðalagi á Íslandi gætu þarna haft verulega áhrif.
Á sama tíma má minna á að nú í júlí hófst Íslandsflug Edelweiss flugfélagsins og það kann að skýra hækkunin í kortaveltu Svisslendinga milli júní og júlí í ár að einhverju leyti. Hún hækkaði reyndar mjög mikið eða um 51 prósent eins og sjá má á töflunni hér fyrir neðan.
Taflan sýnir líka hversu miklar sveiflur geta verið í eyðslu hverrar þjóðar milli mánaða þegar kortanotkuninni er deilt niður á fjölda ferðamanna frá viðkomandi landi.
Það er því í raun á mörkunum að þess háttar útreikningar gefi góða mynd af stöðu mála. Þetta segir okkur til að mynda fátt um eyðslu pólskra ferðamanna. Pólverjar búsettir á Íslandi eru nefnilega taldir sem pólskir farþegar á Keflavíkurflugvelli. Greiðslukortanotkunin er svo vafalítið mest öll með íslenskum kortum.
