Flugáætlun Play gerir ráð fyrir að þotur félagsins fljúgi fjórum sinnum í viku til höfuðborga Þýskalands, Bretlands og Frakklands.
Nú hafa hins vegar verið teknar úr sölu brottfarir til borganna þriggja í næsta mánuði.
Skýringin á þessum breytingum liggur í minni eftirspurn eftir flugferðum sem rekja má til stöðu Covid-19 faraldursins að sögn Nadine Guðrúnar Yaghi, upplýsingafulltrúa Play.
„Í gær felldum við niður 14 ferðir sem voru á ætlun í september til Berlínar, Parísar og London. Ástæðan er einfaldlega kórónuveiran og Play, líkt og öll stærstu flugfélögin á Keflavíkurflugvelli, sá sér ekki annað fært en að hagræða áætlun sinni á þessum óvissutímum. Farþegar sem voru bókaðir í umrædd flug hafa þá kosti að fá endurgreitt, breyta um ferðadagsetningu eða fá endurgreitt í formi gjafabréfs með 10 prósent álagi,“ segir Nadine.
Hún bætir því við að Play merki áhuga á ferðalögum í haust og að eftirspurnin sé mjög fín miðað við aðstæður. Sérstaklega meðal erlendra ferðamanna á leið til Íslands.
