Flugmálayfirvöld hér á landi veita engar upplýsingar um fjölda farþega efir flugleiðum. Þess háttar gögn eru þó opinber í flestum löndum og þannig sýna nýjar tölur frá Kaupmannahöfn að 33.383 farþegar nýttu sér flugferðirnar milli Íslands og Kastrup í síðasta mánuði.
Það er aukning um 43 prósent frá ágúst í fyrra en þegar horft er til ársins 2019 þá nemur samdrátturinn 52 prósentum.
Og flugferðunum fækkaði hlutfallslega nærri jafnmikið því samkvæmt talningum Túrista þá voru farnar 404 ferðir milli Keflavíkurflugvallar og Kaupmannahafnar í ágúst 2019. Að þessu sinni voru þær 210.
Farþegafjöldinn í ágúst dugar til að tryggja Keflavíkurflugvelli eða „Keflavík/Reykjavík“ tíunda sætið á lista Kaupmannahafnarflugvallar yfir þá staði sem oftast var flogið til í ágúst.
Í fyrsta sæti á listanum er hins vegar Álaborg og svo kemur Stokkhólmur og Amsterdam er í þriðja sæti.
Palma á Mallorca er sú borg í suðurhluta álfunnar sem flestir flugu til frá dönsku höfuðborginni og þar á eftir Malaga. Hvorug þessara borga er hluti af úrvali íslenskra flugfélaga eða ferðaskrifstofa.
