Á degi Ábyrgrar ferðaþjónustu fyrr í dag veitti forseti Íslands Guðni Th. Jóhannesson hvatningarverðlaun Ábyrgrar ferðaþjónustu. Verðlaunin voru veitt við hátíðlega en fámenna athöfn í Grósku. Að þessu sinni féllu verðlaunin Höldi – bílaleigu Akureyrar í skaut.
Í tilkynningu kemur fram að margar frambærilegar tilnefningar hafi borist dómnefnd að þessu sinni sem gefa tilefni til bjartsýni og trú á framtíð íslenskrar ferðaþjónustu með sjálfbærni að leiðarljósi.
„Val dómnefndar var ekki auðvelt, en með þá sýn að geta boðið öllum ferðamönnum að aka um landið með visthæfum hætti er vel við hæfi að þakka frumkvöðlunum hjá Höldi – Bílaleigu Akureyrar sérstaklega fyrir þeirra framlag og veita þeim hvatningu til að takast á við þau verkefni og áskoranir sem framundan eru í áframhaldandi vegferð,“ segir í tilkynningu.
Í rökstuðningi dómnefndar fyrir valinu á Höldi – Bílaleigu Akureyrar segir að fyrirtækið hafi náð 85%
endurvinnsluhlutfalli og starfsfólk þess hefur gróðursett yfir þrjátíu þúsund tré
frá árinu 1995.
„Þegar kemur að öryggi leigutaka nýtir fyrirtækið appið „Your Friend in Iceland“
þar sem hægt er að miðla opinberum viðvörunum auk þess sem hægt er að hafa samband við
leigutaka ef hætta steðjar að á ákveðnum svæðum í gegnum ökurita sem staðsettir eru í
bílunum. Þá fá leigutakar upplýsingar um græn akstursráð þar sem hvatt er til góðrar umgengni
um landið,“ segir í rökstuðningi.
Höldur er með jafnlaunavottun og starfar samkvæmt vottuðu ISO 9001 gæðastjórnunarkerfi og
ISO 14001 umhverfisstjórnunarkerfi. Fyrirtækið rekur mannauðsskóla þar sem áhersla er lögð á
jafnréttismál, öryggi- og heilsuvernd, fræðslu starfsmanna og þjálfun. Þá er einnig öllu erlendu
starfsfólki boðin kennsla í íslensku þeim að kostnaðarlausu og fara námskeiðin fram á þeim
tungumálum sem starfsfólk fyrirtækisins skilur.
Í dag á Höldur hátt í 300 rafbíla, 600 tengiltvinnbíla og 530 Hybrid bíla og nokkra Metan bíla. Meðalútblástur bílaflota fyrirtækisins hefur lækkað um 30 prósent frá árinu 2007.
