Hlutabréf í norska flugfélaginu Flyr féllu um ríflega fimmtung í gær eftir að tilkynnt var um verulegan niðurskurð í vetraráætlun félagsins. Stjórnendur Norse ætla líka að draga úr áformum sínum í vetur.
Stuttu eftir að kauphöllinni í Ósló var lokað á þriðjudaginn sendu stjórnendur Flyr frá sér tilkynningu þar sem greint var frá stórfelldum sparnaðaraðgerðum. Þær fela í sér að félagið fækkar ferðunum um nærri helming og þá aðallega innanlands. Með þessu er vonast til að Flyr blæði ekki út ef svo má segja því tapið hefur verið gríðarlegt allt frá því að félagið hóf flugrekstur í lok júní í fyrra.
Síðan þá hefur Flyr efnt til opinna og lokaðra hlutafjárútboða og í heildina safnað um 1,1 milljarði norskra króna sem jafngildir um 15 milljörðum íslenskra króna. Markaðsvirði félagsins í dag er rétt um fimmtungur af þessari upphæð. Gengi hlutabréfanna fellur nefnilega hratt og lækkun ársins nemur um þremur fjórðu.
Áfram er ætlunin að sækja fé til norskra auðkýfinga og fjárfestingasjóða en Karin S. Thorburn, prófessor við Viðskiptaháskólann í Ósló, er ekki bjartsýn á að það takist. Sérstaklega ekki í dag þegar fjárfestar eru ekki eins bjartsýnir á stöðu mála og þeir hafa verið undanfarin misseri.
Í flota Flyr eru 12 þotur í dag sem nýttar eru bæði í innanlandsflug og ferðir til Evrópu frá Ósló.
Bíða með Kaliforníu
Norse Atlantic er annað nýtt norskt flugfélag og það fór sína fyrstu ferð nú í sumar. Þar á bæ er gert út á Ameríkuflug frá Ósló, London og Berlín. Og vetraráætlun Norse gerði ráð fyrir tíðum ferðum til Los Angeles en nú hafa stjórnendur félagsins ákveðið að setja þær á ís þar sem horfurnar fyrir komandi vetur hafa versnað.
„Ég tel að fólk í Noregi, Evrópu og Bandaríkjunum sé óöruggara en áður vegna verðbólgu, hærri rafmagnskostnaðar og hækkandi vaxta. Sú mynd sem dregin er upp í fjölmiðlum er dökk og það hefur áhrif á eftirspurnina. Við getum stigið á bremsuna og verið varkár enda borgum við bara leigu af þeim flugvélum sem eru í loftinu,“ segir Bjørn Tore Larsen, forstjóri Flyr, í viðtali við Dagens Næringsliv.