Síðustu tvær sumarvertíðir hafa tvö ísraelsk flugfélög haldið úti ferðum hingað til lands en þó eingöngu fyrir ísraelska ferðamenn. Næsta sumar geta hins vegar allir sem eiga leið milli Íslands og Ísrael flogið beint milli landanna tveggja með Icelandair því félagið áformar að hefja flug til Tel Aviv þann 10. maí á næsta ári. Í boði verða þrjár brottfarir í viku fram í lok október.
Þetta verður í fyrsta sinn í nærri fimm ár sem íslenskt flugfélag heldur úti áætlunarflugi til Ísrael en Wow Air spreytti sig á ferðum til Tel Aviv í eitt ár frá haustinu 2017. Félagið ráðgerði að taka upp þráðinn á ný sumarið 2019 en ekkert varð af því þar sem Wow Air varð gjaldþrota í mars það ár.
Þá ætluðu stjórnvöld í Ísrael að styðja við útgerð Wow Air með framlagi upp á nærri hálfa milljón evra. Sú upphæð jafngildir um 70 milljónum króna í dag en samkvæmt svari frá Icelandair þá fær félagið ekki styrki frá þarlendum yfirvöldum vegna ferðanna til Tel Aviv enda séu þeir aðeins veittir einu sinni fyrir hverja leið. Og þar sem áður hefur verið flogið frá Keflavík til Tel Aviv þá stóð styrkurinn ekki til boða nú.
Icelandair hefur heldur ekki tryggt sér samninga við ísraelskar ferðaskrifstofur um Íslandsferðir á næsta ári.
Ísraelar í meirihluta
Sem fyrr segir hélt Wow Air úti ferðum til Tel Aviv í eitt ár frá haustinu 2017 og á því tímabili flutti félagið nærri 18 þúsund farþega til og frá Tel Aviv. Þar af voru um 10 þúsund farþegar með ísraelskt vegabréf á meðan íslensku farþegarnir voru rétt um 2.600 samkvæmt tölum Wow Air.
Stór hluti erlendu farþeganna nýtti sér ferðir Wow Air til að komast milli Norður-Ameríku og Ísrael og millilenti því eingöngu hér á landi. Langflestir þessara tengifarþega voru á leið til og frá New York en einnig naut tengiflug Wow Air til Toronto og Washington svæðisins vinsælda hjá ísraelsku farþegunum.
