Nú er unnið að því að stækka og endurbæta farangurskerfið í Flugstöð Leifs Eiríkssonar. Liður í því eru breytingar á farangursfæriböndum í brottfararsalnum. Vinna mun standa fram í apríl og geta farþegar búist við töfum við innritun farangurs. Icelandair bregst við þessu með því að bjóða farþegum sínum að aka suður á flugvöll kvöldið fyrir brottför og innrita farangur sinn til að létta á afgreiðslunni morguninn eftir. Þessi þjónusta verður í boði milli klukkan 19 og 22.
Segir félagið í tilkynningu að þetta geti hentað vel þeim farþegum sem eru á hraðferð eða þeim sem ferðast með mikinn farangur. Farþegar geti svo við komuna á völlinn daginn eftir farið beint í öryggisleit. Farþegar þurfa að innrita farangur sinn í eigin persónu og hafa með sér vegabréf.
„Við erum alltaf að leita leiða til að auka þjónustuframboð okkar og við viljum leggja okkur fram um að draga úr áhrifum sem framkvæmdir á Keflavíkurflugvelli hafa á farþega,“ er haft eftir Sylvíu Kristínu Ólafsdóttur, framkvæmdastjóra markaðsmála og þjónustu Icelandair.
Fyrir þá sem eru ekki tilbúnir í ökuferð til Keflavíkur kvöldið fyrir flug geta nýtt sér þjónustu Öryggismiðstöðvarinnar, sem sækir farangur heim til fólks og annast innritun á honum. Þessi þjónusta er í boði fyrir þá farþega Icelandair á höfuðborgarsvæðinu sem hafa innritað sig rafrænt. Samkvæmt upplýsingum á vefnum bagdrop.is er gjaldið fyrir eina tösku 7.390 krónur en 8.710 krónur fyrir tvær töskur.
