Túristi flaug í gegnum Schiphol-flugvöll á dögunum. Kom sér tímanlega inn í Boeing 737-700 vél KLM og setti handfarangur í hólfið fyrir ofan sætið – tösku af þeirri gerð sem Íslendingar kölluðu einu sinni „flugfreyjutösku“ af því að flugfreyjur voru líklega fyrstar til að vera með svona litla tösku á hjólum. Farþegarnir streymdu um borð hver af öðrum og smám saman tók að bera á því að farþegar gátu ekki komið handfarangrinum fyrir nærri sæti sínu. Upphófst þá mikil rekistefna. Flugfreyjur færðu til töskur frá einum hluta vélarinnar til annars og áhyggjusvipurinn hertist á andlitum þeirra farþega sem sáu á bak töskunni sem hefði verið svo gott að hafa nærri sér. Allt þetta vafstur tafði brottför frá Schiphol. Þetta var síðdegis á fimmtudegi og stór hluti farþega vafalaust á leið í langt helgarfrí.
Nokkrum dögum seinna endurtók þetta vafstur sig um borð í Airbus 320-vél SAS í Mílanó. Lengstu samningaviðræðurnar voru við hjón sem sátu fyrir framan Túrista en þau voru mjög ósátt við að geta ekki haft handfarangurinn nærri sér. Taskan var reyndar grunsamlega stór og þung. Þau vildu helst hafa töskuna til fóta en það leyfðu flugfreyjurnar ekki. Á endanum var taskan tekin og komið fyrir annars staðar. Flugvélin tók loks á loft.
Þessi tilhneiging að láta handfarangur duga í stuttar ferðir hefur þessi áhrif um borð í vélunum. Það tekur lengri tíma en ella að koma öllu á öruggan stað. Flugfélögin eru orðin einbeittari í því að reglur um stærð og þyngd handfarangursins séu virtar. Icelandair og Play gefa upp á vefsíðum sínum leyfilega stærð á handtösku og hún má ekki vega meira en 10 kg. Túristi kannast raunar við að hafa verið boðin gjaldfrjáls innritun fyrir handfarangur. Handtaskan er þá sett í lest og það dregur úr vafstrinu um borð fyrir flugtak.
Einhverjum gæti þótt þetta léttvægt umfjöllunarefni en þegar það er skoðað ofan í kjölinn blasir við stærri mynd:
Vandræði við afgreiðslu á farþegum og farangri þeirra hafa farið vaxandi víða eftir heimsfaraldurinn. Hundruð þúsunda ferðataska misfórust á flugvöllum síðasta sumar og voru þau vandræði rakin til skorts á fólki til að sinna afgreiðslu og öryggiseftirliti. Það hefur enn ekki ræst úr þessu mjög víða. Starfsemi á stórum flugvöllum í Bretlandi, Frakklandi og Þýskalandi hefur farið úr skorðum vegna skorts á vinnuafli. Eins og við mátti búast hafa félög þessa starfsfólks farið í verkföll og bent á að hækka verði launin til að bregðast við miklu álagi og auka líkur á að fleiri fáist í störfin. Við fréttum af þessum vandræðum á flugvöllum bregst ferðafólk og ákveður að ferðast með lítinn farangur – lætur duga „flugfreyjutöskuna” og litla skjóðu eða bakpoka. Þá sleppur það við að bíða við færibandið – en gæti lent í vandræðum að koma dótinu fyrir ef það fer seint um borð í vélina.
