Tekjur Isavia samstæðunnar námu 15,7 milljörðum í fyrra sem var aukning um 75 prósent frá árinu á undan. Rekstrarafkoman var jákvæð um 5,2 milljörðum króna í fyrra samanborið við 810 milljón króna tap árið 2021. Þegar afskriftir, fjármagnsliðir og skattar eru teknir með inn í dæmið þá var Isavia hins vegar gert upp með 809 milljón króna tapi á síðasta ári.
Hjá dótturfélögunum var tapið mest hjá Keflavíkurflugvelli eða 1,5 milljarður króna. Aftur á móti af afkoman best hjá Fríhöfninni sem skilaði hagnaði upp á 856 milljónir kr.
Isavia ANS sem sinnir flugleiðsögu í innanlandsflugi á Íslandi og á flugstjórnarsvæði yfir Norður-Atlantshafinu hagnaðist um 100 milljón króna en tapið af innanlandsflugvöllunum nam 273 milljónum.
„Árið 2022 markaði þann viðsnúning sem beðið var eftir að loknu tveggja ára óvissutímabili heimsfaraldurs. Ísland er sem fyrr einstakur áfangastaður og tengistöðin áfram lykillinn að flugtengingum sem styðja við lífsgæði og velsæld á Íslandi,“ segir Sveinbjörn Indriðason, forstjóri Isavia, í tilkynningu.
Þar bendir Sveinbjörn á að nú í vetur hafi verið 12 prósent meira sætaframboð til og frá Keflavíkurflugvelli en síðasta vetur fyrir heimsfaraldurinn.
„Á flugvöllunum í Kaupmannahöfn, Osló, Stokkhólmi og Helsinki, sem við berum okkur gjarnan saman við, hafi verið 8-25% minna sætaframboð,“ bætir forstjórinn við.
Ef horft er til ársins 2018, sem var metár á Keflavíkurflugvelli, þá nam samdrátturinn í fjölda farþega í fyrra 37 prósentum. Í ár er gert ráð fyrir að farþegarnir verði 7,8 milljónir.
