Hildur Ómarsdóttir sem átt hefur stóran þátt í uppbyggingu Iceland Berjaya hótelanna, áður Icelandairhótelanna, hefur látið af störfum eftir 20 ára starf. Hildur hefur síðustu ár verið aðstoðarframkvæmdastjóri þessa næststærsta hótelfyrirtækis landsins en áður markaðs- og þróunarstjóri þess til fjölda ára. Á þeim tíma opnaði félagið mörg ný hótel og nú síðast Iceland Parliament Hotel við Austurvöll.
Í tölvupósti sem Hildur sendi á samstarfsfólk sitt segir að hún hafi komist að samkomulagi um starfslok sem tekið hafi gildi nú þegar. Hildur segist jafnframt ganga stolt frá borði enda hafi tími hennar hjá fyrirtækinu einkennst af mikilli uppbyggingu.
Heimildir Túrista herma að ákvörðun Hildar að segja upp störfum hafi valdið töluverðum titringi meðal starfsfólks hótelfyrirtækisins enda hafi hún lengi verið þar í mikilvægu hlutverki.
Hildur er þriðji lykilstjórnandinn sem hættir hjá Iceland Berjaya hótelunum eftir að Icelandair Group seldi hótelin til malasísku samsteypunnar Berjaya árið 2019. Í apríl 2021 lét Magnea Þórey Hjálmarsdóttir af störfum sem framkvæmdastjóri eftir 16 ár hjá fyrirtækinu og eftirmaður hennar, Ingólfur Haraldsson, hætti í desember í fyrra. Vísaði hann til þess að samstarf sitt við eigendur fyrirtækisins ætti sér ekki framtíð. Ingólfur hafði unnið fyrir hótelkeðjuna frá árinu 1993.
Þess má geta að Tryggvi Þór Herbertsson, fyrrum fulltrúi Berjaya Group, hér á landi tók við sem stjórnarformaður hótelanna þegar kaupin gengu í gegn árið 2019. Hann fór hins vegar úr stjórninni í fyrra og við stjórnarformennskunni tók Chryseis Tan Sheik Ling.