Alþingi samþykkti fyrir jólahlé lög sem fela í sér að eigendur bíla sem knúnir eru rafmagni eða vetni greiði 6 króna kílómetragjald en þau sem aka tengiltvinnbílum sleppa með að greiða 2 krónur á kílómetrann.
Þó almennt sé viðurkennt að eðlilegt sé að eigendur hreinorkubíla og bíla sem teljast vistvænni en sprengihreyfilsbílar greiði sinn hlut til uppbyggingar og viðhalds vegakerfisins þá óttast margir að þessi gjaldtaka hægi á nauðsynlegum orkuskiptum í umferðinni. Þá undrast sumir hvers vegna hærra gjald er lagt á rafbíla en tengiltvinnbíla. Í viðtali við Túrista (FF7) í haust sagði Egill Jóhannsson, forstjóri Brimborgar:
„Stjórnvöld trúðu vitleysunni um að tengiltvinnbílar væru bara eknir á bensíninu. Nú er hagkvæmt að selja rafbílinn og kaupa tengiltvinnbíl í staðinn. Af því að þú getur látið hann duga. Konan mín er á tengiltvinnbíl og ekur 95 prósent á rafmagni. Hún mun bara borga 2 krónur í kílómetragjald á meðan sá sem ekur hreinan rafbíl greiðir 6 krónur!“
FÍB hefur gagnrýnt að sama kílómetragjald verði lagt á alla rafbíla óháð þyngd. Það þýði að eigendur bíla sem geti verið allt að þrisvar sinnum þyngri en þeir léttustu borgi sama gjald fyrir afnot af vegakerfinu.
Náttúruverndarsamtök Íslands bentu á það á meðan frumvarpið um kílómetragjaldið var til afgreiðslu á Alþingi að engin greining lægi fyrir um áhrif álagningar gjaldsins á loftslagsstefnu stjórnvalda. Samtökin telja að ganga verði lengra í fjárfestingum á rafbílum og hleðslustöðvum til að viðhalda þeim árangri sem náðst hefur í rafbílavæðingunni.
