Skortur á flugmönnum og flugvélum hefur hamlað framboði á flugi víða um heim eftir heimsfaraldur. Verð á flugvélum hefur því hækkað og laun flugmanna hækkað.
Stærstu flugfélög Bandaríkjanna hafa síðustu misseri bætt kjörin umtalsvert og nú hafa flugmenn Southwest Airlines, stærsta lágfargjaldaflugfélags Bandaríkjanna, samþykkt tilboð um 29,15 prósent launahækkun. Sú kjarabót tekur gildi strax við undirritun samnings en 93 prósent flugmanna Southwest samþykktu samninginn.
Launin munu svo hækka árlega um 4 prósent fram til ársloka 2028. Auk þess verður réttur flugmanna til fæðingarorlofs aukinn og draga á úr vinnuálagi, meðal annars með fleiri nýliðum.
Kjarabætur flugmanna ná einnig hingað til lands því þann 1. október sl. hækkuðu grunnlaun flugmanna Play umtalsvert og það verður aftur gert þann þann 1. mars nk. Þar með hafa grunnlaun flugmanna félagsins hækkað um ríflega helming og verð þá launin álíka og nýjum flugmönnum bjóðast hjá Icelandair. Í fyrra sótti fjöldi flugmanna Play um starf hjá keppinautnum og fékk svo tilboð um fasta stöðu. Félagið hefur því þurft að bregðast við þeirri stöðu með því að bæta launakjör flugmanna.