Arnar Már Magnússon, einn af stofnendum flugfélagsins Play og fyrsti forstjóri þess, hefur verið gerður að aðstoðarforstjóra. Hann mun áfram sinna stöðu framkvæmdastjóra flugrekstrarsviðs en við þeirri stöðu tók hann á nýjan leik í mars í fyrra.
„Það hefur verið einstakt að fylgjast með Play slíta barnsskónum og nú stöndum við á tímamótum þar sem við erum í kjörstöðu til að gera enn betur. Ég hef stoltur fylgst með samstarfsmönnum vaxa og dafna í gegnum þetta krefjandi ferli að stofna nýtt flugfélag og nú státum við að glæsilegu fyrirtæki sem hefur alla burði til að verða enn betra. Ég er þakklátur því trausti sem mér er sýnt með þessari breytingu og fullur eftirvæntingar að auka hróður Play enn frekar með samstarfsfólki mínu,“ segir Arnar Már Magnússon nýr aðstoðarforstjóri.
Einar Örn Ólafsson sem tók við sem forstjóri Play þann 1. apríl segir Arna Má vera lykilmann innan fyrirtækisins og að þekking hans og reynsla muni nýtast afar vel í næstu skrefum. „Ég er virkilega þakklátur að hafa hann mér við hlið og sannfærður um að þetta sé mikið heillaskref fyrir félagið.“
