Yfir sumarmánuðina eru Þjóðverjar vanalega næst fjölmennsta þjóðin í hópi ferðamanna hér á landi á eftir Bandaríkjamönnum. Og þýsku ferðamennirnir gefa sér oft góðan tíma á Íslandsferðirnar. Þannig dvaldi hver Þjóðverji sem hingað koma sumarið 2019 í eina viku að meðaltali. Til samanburðar stoppuðu bandarísku túristarnir að jafnaði í fjórar nætur.
Fjöldi þýskra ferðamann hefur hins vegar dregist saman síðustu ár í takt við fækkun flugferða milli landanna tveggja. Þar vegur þungt fall Airberlin sem lengi var stórtækt í Íslandsflugi. Sömu örlög biðu Germania en það félag bauð upp á ferðir hingað frá nokkrum minni borgum í Þýskalandi.
Næsta sumar er svo útlit fyrir að annað þýskt flugfélag hverfi frá Keflavíkurflugvelli.
Þar með verða flugfélögin þrjú sem halda úti fluginu héðan til Þýskalands næsta sumar. Framboð á flugi hingað frá Þýskalandi hefur því dregist verulega saman eins og sjá má á töflunni hér fyrir neðan.
Sumarið 2017 var til að mynda flogið hingða frá tólf þýskum borgum en þá náði fjöldi þýskra ferðamanna hér á landi hámarki. Nú í sumar er eingöngu Íslandsflug á dagskrá frá fimm þýskum borgum.
Þotur Lufthansa munu sem fyrr fljúga hingað frá Frankfurt og Munchen og til beggja þessara borga flýgur Icelandair einnig. Auk þess er áætlunarflug til Hamborgar og Berlínar á dagskrá Icelandair. Frá Dortmund munu svo þotur Wizz Air fljúga reglulega.
