Það eru vísbendingar um að komandi sumarvertíð hér á landi skili bandarísku gistimiðluninni Airbnb góðum tekjum. Laus gisting á vegum fyrirtækisins hér á landi í sumar er nefnilega töluvert minna en nú í vor en framboð á heimagistingu á landsvísu er í takt við það sem var fyrir heimsfaraldur.
Ennþá eru gistinætur útlendinga í heimagistingu þó færri en þá var en samkvæmt nýju mati Hagstofunnar voru þær engu að síður 92 þúsund talsins í mars sl. Það er aukning um 20 þúsund nætur frá sama tíma í fyrra.
Fjöldinn er þó ennþá töluvert frá því sem var í marsmánuði á árunum 2017 til 2019 eins og sjá má hér fyrir neðan.
Gistnætur útlendinga í svefnbílum voru um 2 þúsund í mars samkvæmt mati Hagstofunnar sem eru um helmingur af því sem var fyrir Covid-19.
Hlutdeild skráðrar gistingar, til að mynda hótela og gistihúsa, var um 84 prósent í mars sem er aðeins hærra hlutfall en á árum áður en sem fyrr segir stefnir í að ásókn í heimagistingu verði mikil hér á landi í sumar. Skrifast þá meðal annars á þá staðreynd að framboð á hótelrými hefur lítið breyst en búist er við álíka fjölda ferðamanna í sumar og metárin 2017 til 2019.
