„Við erum stór í Frakklandi, við erum stór í Bretlandi. Við sjáum mikinn vöxt í Þýskalandi en það eru margir markaðir í Evrópu þar sem við höfum ekki keyrt almennilegar auglýsingaherferðir. Núna erum við aðgangsharðari á Ítalíu og á Spáni og við erum að horfa til annarra markaða í Norður-Evrópu. Ég tel að það séu í raun mörg vaxtarsvæði í Evrópu því við höfum í raun bara einbeitt okkur að stærstu mörkuðunum.“
Þetta eru orð Brian Chesky, stofnanda og forstjóra Airbnb, á fundi með fjárfestum nýverið þar sem hann kynnti uppgjör gistimiðlunarinnar á fyrsta ársfjórðungi. Niðurstaðan var hagnaður upp á 117 milljónir dollara eða um 16 milljarða íslenskra króna. Rekstur Airbnb hefur aldrei áður verið réttum megin við núllið á þessum árstíma.
![](http://ff7.is/wp-content/uploads/2023/05/airbnb-rkv-frb2023-1200x579.jpg.webp)
Í fyrrnefndum orðum Chesky er ekkert að finna um Ísland en ljóst að hann sér tækifæri til aukinnar útbreiðslu í okkar hluta Evrópu. Hér á landi er Airbnb nú þegar með stóran hluta af markaðnum og framboðið í dag er álíka og það var þegar mest lét.
Samkvæmt greiningum Ferðamálastofu þá voru um 5 þúsund íslenskir gistikostir á sölu hjá Airbnb í febrúar en þeir voru um eitt þúsund fleiri í sama mánuði metárið 2018. Á þessari stundu liggja aðeins fyrir tölur fyrir fyrstu tvo mánuð ársins en hjá Hagstofunni er til mat á umsvifum Airbnb í mars. Og samkvæmt því greiddu útlendingar fyrir 92 þúsund gistinætur hér á landi í gegnum heimasíður eins og Airbnb í marsmánuði. Næturnar voru þriðjungi fleiri eða um 120 þúsund í mars árin 2018 og 2019.
Til samanburðar voru gistinætur útlendinga í skráðri gistingu 509 þúsund í mars sl. Miðað við þessar tölur þá voru Airbnb og sambærilegar leigusíður með hátt í fimmtungs hlutdeild á íslenska gistimarkaðnum nú í ársbyrjun þegar horft er til ferðamanna.
Sambærilegt mat á umsvifum Airbnb liggur ekki fyrir í nágrannalöndunum en sjá mátti í tölum sem Airbnb birti árið 2017 að íslenskir leigusalar þénuðu langmest allra það ár. Þá voru tekjur Íslendinga af Airbnb að jafnaði fjórum til fimm sinnum hærri en tekjur Dana og Svía.
Airbnb hefur hvorki fyrr né síðar birt sambærilegar upplýsingar og því ekki hægt að sjá hver þróunin hefur verið.