Kaup Campari-samsteypunnar á Courvoisier, einum fjögurra stóru konjak-framleiðandanna, eru krúnudjásn á viðskiptaferli forstjórans Bob Kunze-Concewitz sem ætlar að hætta störfum á næsta ári. Á síðustu árum hefur hann leitt mikinn vöxt Campari með kaupum á öðrum framleiðendum, þ.á m. franska Grand Marnier árið 2016. Fyrir átti Campari lítinn konjak-framleiðanda, Bisquit, en Courvoiser er í úrvalsdeild framleiðenda í Cognac-héraðinu í Frakklandi.
![](https://ff7.is/wp-content/uploads/2023/12/BKC_Aperol-1-1018x800.jpg)
Bob Kunze-Concewitz, forstjóri Campari-samsteypunnar – MYND: Campari Group
Með kaupum á Courvoisier fyrir um 1,3 milljarða dollara er Campari farið að veita risunum á áfengismarkaðnum, Diageo og Pernod Ricard, alvöru samkeppni. Campari getur nú státað af því að framleiða aperatífa, freyðivín, líkjöra, búrbon, tekíla og konjak. Bob Kunze-Concewitz gerir ráð fyrir að með kaupunum aukist heildarsala fyrirtækisins um 9 prósent og hann sér fyrir sér að Campari nýti betur framleiðslugetu sína og markaðsstyrk í Frakklandi.
![](https://ff7.is/wp-content/uploads/2023/12/Courvoisier-i-Jarnac-.webp)
Höfuðstöðvar Courvoisier í Jarnac – MYND: Courvoisier
Höfuðstöðvar Courvoisier eru í bænum Jarnac við ána Charente í suðvestanverðu Frakklandi, á milli Angoulême og Cognac. Jarnac er líklega þekktastur fyrir konjakið og að vera fæðingarbær François Mitterrand, fyrrverandi Frakklandsforseta, sem jafnframt hvílir þar. Nú er konjakið. bæjarstolt Jarnac, komið í hendur ítalskrar stórsamsteypu.
Það er ekki síst á Bandaríkjamarkaði sem Campari-samsteypan treystir sig nú í sessi. Rúmur helmingur af sölu Courvoisier-konjaksins er þar vestra. Þá eru miklir sóknarmöguleikar sagðir í Suðaustur-Asíu, einkum í Kína. Með betri fótfestu á þessum tveimur stóru markaðssvæðum, Bandaríkjunum og Kína, getur Campari velgt stærri keppinautum undir uggum.
Saga Campari-samsteypunnar hófst í Novara í Piedmont-héraði vestur af Mílanó árið 1860 þegar vínbruggaranum Gaspare Campari tókst að blanda fagurrauðan bitter eða aperatíf. Árið 1867 opnaði Gaspare Campari síðan vínbar við dómkirkjutorgið í Mílanó, Camparino in Galleria, við innganginn í hinni frægu gleryfirbyggðu verslunargötu Galleria Vittorio Emanuele, sem til varð um svipað leyti. Þangað soguðust listamenn og bóhemar borgarinnar og bitterinn rauði varð stöðugt vinsælli. Það var síðan sonurinn, Davide Campari, sem lét reisa fyrstu Campari-verksmiðjuna í Sesto San Giovanni í útjaðri Mílanó árið 1904.
![](https://ff7.is/wp-content/uploads/2023/12/IMG_4429-1067x800.jpeg)
Galleria Vittorio Emanuele í Mílanó – MYND: ÓJ
Landar þeirra Campari-feðga, bræðurnir Luigi og Silvio Barbieri í Padua, löguðu árið 1919 annan og veikari bitter, Aperol, sem nú er í eigu Campari-samsteypunnar. Af öðrum vörumerkjum Campari-samsteypunnar má nefna Cinzano-vermúð, Wild Turkey-búrbon, Bulldog-gin, Skyy-vodka, freyðivínið Riccadonna – og að ógleymdum franska Grand Marnier, sem blandað er úr konjaki og appelsínulíkjör.