Vefmiðillinn Túristi hóf sitt ferðalag fyrir 14 árum en í dag birtist hann lesendum undir nýju nafni og í breyttum búningi, sem ekki er þó fullskapaður heldur í mótun: FF7 – Frásagnir og fréttir alla daga.
Áfram verða ferðamál í öndvegi en leitað fanga víðar, birtar áhugaverðar og skemmtilegar frásagnir af ýmsu tagi og fréttir af umsvifum fólks og fyrirtækja. Áfram verður lögð áhersla á vandaða, upplýsandi og gagnrýna umfjöllun. Ritstjórar FF7 eru Kristján Sigurjónsson (útgefandi og ábyrgðarmaður) og Óðinn Jónsson.
Með þessari breytingu fjölgar þeim sem skrifa í vefmiðilinn. Þau fyrstu eru Halla Ólafsdóttir, blaðamaður á Ísafirði, Sólveig Jónsdóttir, rithöfundur og blaðamaður í Reykjavík og Snæbjörn Arngrímsson, rithöfundur og fyrrverandi útgefandi í Kaupmannahöfn. Á næstu mánuðum bætast fleiri í þennan hóp sem skrifar í FF7.
Áskrifendur hafa óheftan aðgang að öllu efni en áfram verða margar greinar opnar öllum.