„Ég held að þetta eigi ekki eftir að breyta miklu. Feneyjar eru einstakur staður og allir vilja berja þær augum. Eftir heimsfaraldurinn vilja fleiri koma. En þegar stórir hópar flykkjast að og talað er í hátalara þá er töfrum borgarinnar spillt – ekki bara fyrir sjálfum íbúunum heldur líka öðrum ferðamönnum. Það verður að skipuleggja þessar heimsóknir betur í þágu ferðaþjónustunnar en líka vegna íbúanna sem eru að gefast upp og flytjast í burtu,“ segir Feneyingurinn Francesco Da Mosto, sagnfræðingur og arkitekt, í viðtali við Newshour á BBC, í tilefni af nýjustu ákvörðunum borgaryfirvalda um að stemma stigu við troðningstúrismanum í Feneyjum.
Ferðahópur frá Asíu á Markúsartorginu – MYND: ÓJ
Fyrr í vetur var greint frá því að daggestir þurfi að borga 5 evrur á tilteknum 30 dögum – um helgar og hátíðir – í vor og sumar. Íbúarnir sjálfir, bílstjórar ogbátastjórnendur, stúdentar, börn og þau sem gista í borginni sleppa við að greiða gjaldið. Nú hefur verið ákveðið til viðbótar að frá júníbyrjun verði stærð ferðamannahópa takmörkuð við 25 manns, eða sem svarar um hálffullri rútu, og leiðsögumönnum verður meinað að notast við gjallarhorn eða hátalara, sem valda íbúum miklu ónæði og trufla vegfarendur. Með þessari ráðstöfun er vonast til að ekki verði jafn mikill troðningur á þröngum götum og brúm Feneyja og í eyjunum vinsælu úti á flóanum: Burano, Murano og Torcello.
Á leið út í Murano – MYND: ÓJ
Leiðsögumaður með hóp í Burano – MYND: ÓJ
Feneyjar hafa verið fjölsóttur ferðamannastaður frá því á 18. öld og þjónusta við gesti verið mikilvægt lifibrauð íbúa en fjöldatúrismi síðustu áratuga hefur jafnt og þétt hrakið íbúanna á brott – ágangurinn hefur gert borgina illþolanlega til búsetu.
Þó að yfirvöld hafi gripið til ýmissa ráðstafana til að hemja álagið, eins og að banna komur skemmtiferðaskipa inn að miðborginni, hefur skort framsýni og áræði til að stýra betur daglegu álagi. Þetta hefur orðið til þess að íbúum hefur fækkað hratt í gömlu borginni. Á árum seinni heimsstyrjaldar bjuggu þar um 175 þúsund manns en einungis 49 þúsund eru þar heimilisfastir nú. Hverju íbúðarhúsinu af öðru hefur verið breytt í gistiheimili eða hótel.
Nú eru íbúar Feneyja innan við 50 þúsund – MYND: ÓJ
Árið 2022 voru um 3,2 milljónir gistinátta skráðar í Feneyjum en þær voru væntanlega eitthvað fleiri á nýliðnu ári. Daggestir eru þó margfalt fleiri. Talið er að um 30 milljónir manna komi til Feneyja á ári hverju og allir vilja fara um og sjá sömu staðina: Rialto-brúna og Markúsartorg. Augljóst er að grípa verður til fleiri ráðstafana og dreifa betur gestakomum. Það kom skýrt fram í viðtalinu við Feneyinginn Francesco Da Mosto en hann virtist ekki hafa alltof mikla trú á að honum yrði að ósk sinni.
