Útibú Arion banka á Keflavíkurflugvelli lokaði í janúar og við fjármálaþjónustu í flugstöðinni tók Change Group sem hátti hagkvæmasta tilboðið í þennan rekstur í útboði sem Isavia efndi til í fyrra. Ennþá er Change Group þó ekki komin með tilskilin leyfi til að sinna gjaldeyrisviðskiptum hér á landi samkvæmt því sem FF7 kemst næst og þar með hafa flugfarþegar, sem vilja vera með gjaldeyri í farteskinu, ekki getað keypt reiðufé í flugstöðinni nú í febrúar.
Hjá Isavia standa þó vonir til að úr þessu verði bætt á næstunni.
„Framkvæmdir við nýjar gjaldeyrisskiptastöðvar á Keflavíkurflugvelli eru í fullum gangi og það styttist í opnun þeirra. Það er flókið ferli að innleiða þjónustu og mörg formleg skref sem þarf að taka. Þau hafa verið fleiri en áætlað var í fyrstu. Við þökkum gestum flugvallarins sýndan skilning og þolinmæði á meðan á þessum framkvæmdum stendur og bjóðum þá velkomna í nýjar gjaldeyrisskiptastöðvar þegar þær verða opnaðar,“ segir Guðjón Helgason, upplýsingafulltrúi Isavia, í svari við fyrirspurn FF7.
Guðjón segir að önnur fyrirtæki með rekstur á flugvellinum hafi spurt út í þessa stöðu og er þeim haldið upplýstum um stöðum mála. Það þykir nefnilega ennþá óvenjulegt að ferðalangar geti ekki nálgast erlent reiðufé í flugstöð jafnvel þó notkun á gjaldeyri sé minni en áður var.
