Greint var í gær frá tillögum ítölsku ríkisstjórnarinnar um víðtækar aðgerðir til að fækka rafskútum á götum borga í landinu. Markmiðið er að fækka slysum og fjarlægja hindranir á gangstéttum, þar sem rafskútur liggja gjarnan.
Rafskúta á gangstétt í Róm – MYND: ÓJ
Um leið ætlar ítalska ríkisstjórnin að gera þær breytingar á umferðarlögum að ökumenn sem staðnir eru að því að tala í síma á meðan þeir eru undir stýri missa ökuleyfið og tekið verður af meiri hörku á brotum þeirra sem aka undir áhrifum áfengis eða eiturlyfja.
Rafskútur eru mjög algeng sjón í ítölskum borgum eins og annars staðar. Leigufyrirtæki hafa sprottið upp og langar raðir af þessum farartækjum eru við gagnstéttir og á torgum. Mikið hefur verið um slys á fólki. Á síðustu tveimur árum hafa sex manns látist við akstur á rafskútum og mikið hefur verið um að gangandi vegfarendur hafi orðið fyrir margskonar óþægindum og meiðslum. Þá hefur ekki tekist að fylgja neinum reglum um hvar farartækjunum er lagt.
Rafskútur eru út um allt – MYND: ÓJ
Ítalska ríkisstjórnin vill að allir sem aka rafskútum beri hjálm á höfði, þeir séu tryggðir og ökutækið beri skráningarnúmer. Akstur þeirra verður bannaður á uppbyggðum vegum og hraðbrautum – og bannað að leggja þeim á gagnstéttum.
Þingið þarf að staðfesta þessar reglur áður en þær taka gildi.
Í apríl síðastliðinn samþykktu Parísarbúar bann við rafskútum í atkvæðagreiðslu.
Ferðafólk og rafskútur – MYND: ÓJ
