Parísarbúar samþykktu í atkvæðagreiðslu í gær að leiga á rafskútum í borginni verði bönnuð. Nærri níu af hverjum 10 sögðust hlynntir banni. Kosningaþátttakan var aðeins átta prósent. Af þeim 103 þúsundum sem höfðu fyrir því að mæta á kjörstað og greiða atkvæði sögðust rúmlega 91 þúsund vilja banna rafskútuleigurnar í París, sem var meðal fyrstu borga að leyfa slíka starfsemi fyrir fimm árum.
Gagnrýnendur hafa bent á fjölmarga ókosti við rafskúturnar: þær séu hættulegar í umferðinni, ógn við gangandi vegfarendur, ökumenn noti ekki hjálma og fráleitt sé að börn innan við 12 ára aldur hafi mátt leigja þær. Það vakti hörð viðbrögð fyrir tveimur árum þegar kona lést eftir að hafa verið ekin niður af rafskútu sem tveir voru á.
Anne Hidalgo, borgarstjóri Parísar, var hlynnt banni og hafði sagt fyrir atkvæðagreiðsluna að niðurstaðan yrði virt. Starfsleyfi fyrirtækjanna sem leigja rafskúturnar renna út á næstu mánuðum og farartækin sem liggja gjarnan við gangstéttir hverfa.
Þá er einu áhyggjuefninu færra hjá borgarstjóranum í undirbúningnum fyrir Ólympíuleikana næsta sumar. Unga fólkið sem á eftir að sakna rafskútanna verður að horfa í eigin barm og svara spurningunni: Af hverju mættir þú ekki á kjörstað þegar greidd voru atkvæði um bannið?
