Í ágúst 2026 er áætlað að Victorian Fruit and Vegetable Market í höfuðborg Írlands opni dyr sínar á nýjan leik. Markaðurinn hefur verið lokaður í fimm ár og byggingin legið undir skemmdum en með hjálp 25 milljón evra þróunarstyrks er markmiðið að nýr markaður skáki ekki aðeins hinum víðfræga Enska markaði í Cork heldur mörkuðum og mathöllum um heim allan.
Enski markaðurinn í Cork er löngu orðinn víðfrægur jafnt innan Írlands sem utan. Markaðurinn hefur starfað og átt mikilli velgengni að fagna allt frá árinu 1788 og lifað af ýmis áföll á borð við stórbrunann í Cork árið 1920, hungursneyð, stríð og flóð. Það þykja því ansi djarfar fullyrðingar sem forsvarsmenn endurbyggingar markaðarins í Dublin láta hafa eftir sér um að sá muni skjóta þeim í Cork ref fyrir rass.
Nýr markaður kemur til með að hýsa fjöldan allan af ólíkum framleiðendum þar sem framleiðendur og söluaðilar úr nærumhverfi verða í aðalhlutverki. Byggingin sem hýsir markaðinn var upphaflega opnuð árið 1892 sem það fyrir augum að bæta hreinleiti matarframboðs borgarinnar sem fram að því var boðið á oftar en ekki mishreinum götuhornum borgarinnar.
Byggingin, sem stendur á Mary‘s Lane í nágrenni við Smithfield hverfið, hefur staðið auð frá árinu 2019. Upphaflega stóð til að framkvæmdum yrði lokið árið 2021 en heimsfaraldur og efnahagsárferði setti þær áætlanir úr skorðum eins og víða annarsstaðar.
Á írsku nefnist Smithfield „Margadh na Feirme“ sem einfaldlega útleggst sem „Markaður bænda“ en hverfið hefur þróast ört á undanförnum árum eftir að borgaryfirvöld hófu skipulagða uppbyggingu í þeim hluta Dublin. Ekki alls fyrir löngu var Smithfield í öðru sæti á lista tímaritsins Time Out yfir þau hverfi sem þættu „the coolest on earth“.
Sem stendur er ráðgert að markaðurinn verði opinn frá tíu á morgnana til tíu á kvöldin og komi til með að tendra kærkomið og kúltiverað líf í þessum hluta borgarinnar.
