Fjórðu vikuna í röð hefur bandaríski vogunarsjóðurinn PAR Capital Management selt bréf sín í Icelandair Group. Gengi hlutabréfa í þessu stærsta ferðaþjónustufyrirtæki landsins hefur fallið um rúmlega áttíu af hundraði síðan PAR Capital varð stærsti hluthafinn í apríl í fyrra. Þá var gengið 9,03 en er núna um 1,7.
Hlutur sjóðsins hélst í 13,7 prósentum frá síðasta sumri og fram í lok mars í ár. Núna er hlutdeildin komin niður í 12,5 prósent samkvæmt nýjasta hluthafalista Icelandair. Samtals hefur PAR Capital selt 66 milljónir hluta síðustu vikur og samkvæmt heimildum Túrista á markaði þá eru það aðallega einstaklingar sem eru að kaupa bréfin sem PAR Capital býður til kaups. Sjóðurinn er þrátt fyrir söluna síðustu vikur áfram stærsti hluthafinn í Icelandair.
PAR Capital er þó ekki eini af tuttugu stærstu hluthöfunum í Icelandair sem hefur selt bréf í félaginu frá því í lok mars. Lífeyrissjóðurinn Stapi hefur minnkað eign sína um tæplega fimm prósent og Landsbréf hafa selt tæplega 2 prósent af sínum bréfum.
Aftur á móti hefur fjárfestirinn Högni Pétur Sigurðsson bætt við sig rúmlega 18 milljónum hluta á þessu tímabili og á nú um 2,5 prósent af hlutafé Icelandair.
