Íslandshótelin eru stærsta hótelfyrirtæki landsins og þar er unnið eftir ólíkum sviðmyndum eftir því hvernig heimsfaraldurinn þróast. Davíð Torfi Ólafsson, framkvæmdastjóri, segist þokkalega bjartsýn á komur erlendra ferðamanna þegar líður á haustið en segir ómögulegt að ráða í hvenær allt fer í gang á ný.
„Af sautján hótelum voru bara níu opin þegar mest var síðstliðið sumar. Við erum að opna hótelin eitt af öðru frá febrúar næstkomandi en hvort við verðum með tíu hótel opin í sumar eða fleiri verður að koma í ljós. Þetta ræðst auðvitað allt af eftirspurn og ómögulegt að ráða í hvenær allt fer í gang,“ segir Davíð Torfi Ólafsson, framkvæmdastjóri Íslandshótelanna.
Hann segir að hjá fyrirtækinu sé unnið eftir sviðsmyndum og það velti á framvindu Covid-19 hvaða sviðsmynd er dregin fram á hverjum tíma.
„Við erum þokkalega bjartsýn á að það fari að rofa til þegar líður að hausti hvað erlenda ferðamenn varðar. Svo lengi sem ekki komi bakslag í bólusetningar og svo framvegis,“ bætir Davíð við.
Gistinóttum útlendinga á íslenskum hótelum fækkaði um 92 prósent á tímabilinu apríl til nóvember í ár. Til samanburðar nam samdrátturinn í Noregi 85 prósentum. Þar í landi er vægi heimamanna líka umtalsvert og þannig stóðu Norðmenn sjálfir undir 72 prósent gistinátta á norskum hótelum árið 2019. Vægi Bandaríkjamanna var fjögur prósent og Kínverjar tvö prósent.
Hér heima stóðu bandarískir túristar undir rúmlega fjórðu hverri gistinótt á hótelum og þeir kínversku undir sjö af hverjum hundrað. Vægi íslenskra gesta var rétt um tíund.
